NG gemeente Wespoort

Die NG gemeente Kwaggasrand (gestig in 1974) is een van vier gemeentes wat teen 2015 by Wespoort ingelyf is.

Ds. J.J. van As, leraar van 1968 tot 1977.

Die NG gemeente Wespoort is in ’n gemeente van die Nederduitse Gereformeerde Kerk met sy middelpunt in die Pretoriase voorstad Danville, hoewel die gemeente ’n veel groter gebied beslaan ná die inlywing van die gemeentes Pretoria-Wes (gestig in 1925), Ebenhaeser (1951), Kwaggasrand (1974) en Pretoria-Polisiekollege (1963). In 1985 het dié vyf samestellende dele altesaam 3 736 belydende lidmate en 850 studente-lidmate gehad. Dertig jaar later, in 2015, was Wespoort se belydendelidmaattal 1 300.

Stigting

Onder bokseile, in 'n hoek van die skoolgrond, het die stigtingsvergadering op 22 Januarie 1949 saamgekom om die gemeente van die moedergemeente, Quaggapoort, af te stig. Ons gemeentelike feesalbum skryf nagenoeg drie jaar later: “Dit was werklik in ieder opsig 'n daad van geloof. 'n Betreklik klein getal huisgesinne moes sonder enige kapitale bate of hulp van enige andere gemeente die eerste fondament grawe en die eerste stene aandra. Maar, soos in die dae van Nehemia, was die hart van die volk gewillig om te bou. Die gees wat kerkraad en gemeente besiel het, was andermaal: ‘Die God van die hemel, Hy sal ons dit laat geluk.’”

Kerkbou en eerste leraar

Groot was die vreugde toe die hoeksteen van die kerkgebou op 25 Maart 1950 gelê kon word en toe die voltooide gebou ná ongeveer vier maande aan die Hemelse Vader toegewy kon word.

Dit het twee jaar geduur voordat die eerste beroep uitgebring kon word. Die konsulent, dr. L.V. Rex, en ander leraars het egter met die dienste gehelp. Ook het mnr. C.B. Zietsman 18 maande lank met al die gemeentelike werksaamhede gehelp. Die eerste leraar, dr. T.C. de Villiers, kon op 31 Maart 1951 bevestig word. Ds. P. van der Hoven kon, met 'n treffende rede na aanleiding van Ps. 25:4, 5, die plegtigheid waarneem. Op 1 April kon die leraar sy intreeboodskap oor Hand. 3:6 lewer.

Die gemeente het ook die Leprosegestig Westford ingestluit. Elke Sondagmôre het die leraar destyds daar 'n diens gehou vir pasiënte wat dit kon bywoon. Ons gemeentelike feesalbum se medewerker het geskryf: “Aangrypend en ook beskamend is dit om die ywer en opoffering te bemerk waarmee sommige onder die moeilikste omstandighede die dienste bywoon. Daar is nog veel wat verrig moet word. Die moontlikhede is groot. Die stad brei uit ook in hierdie rigting, en die pragtige gesig wat vanhier oor Pretoria verkry word, sal vele toekomstige bouers hierheen trek. Maar 'n nog skoner gesig is die gesig van die toekoms, wanneer hier 'n groot gemeente opgebou sal wees wat sal help om die koninkryk van Christus ook tot ver oor die heuwels van Pretoria uit te brei.”

Enkele leraars

• Johannes Jacobus van As, 1968 – 1977

Bronne

• (nl) Maeder, ds. G.A. en Zinn, Christian. 1917. Ons Kerk Album. Kaapstad: Ons Kerk Album Maatschappij Bpkt.
• (af) Olivier, ds. P.L. (samesteller), Ons gemeentelike feesalbum. Kaapstad en Pretoria: N.G. Kerk-uitgewers, 1952.

Eksterne skakels

• (en) Die kerkkompleks van die destydse gemeente Ebenhaeser by Frederickstraat 506, Pretoria-Wes, soos te sien op Google Maps. URL besoek op 31 Julie 2015.