Nasionale Voyageurs-park

in Wikipedia, die vrye ensiklopedie
Jump to navigation Jump to search
Voyageurs National Park
Nasionale Voyageurs-park
IUBN Kategorie II (Nasionale park)

Voyageurs National Park map 2005.04.png

Ligging: Minnesota (Verenigde State)
Koördinate: 48°30’0’’N, 92°53’0’’W
Oppervlak: 882 km²
Stigting: 8 April 1975
Beheer deur: National Park Service
Die Nasionale Voyageurs-park in vroeë herfstyd
Die park se naaldbosse is die habitat van Kanadese gaaie (Perisoreus canadensis), plaaslik bekend as Canada jay, gray jay, camp robber of whisky jack (Engels) en geai du Canada of geai gris (Frans)

Die Nasionale Voyageurs-park (Engels: Voyageurs National Park) is 'n nasionale park in die noorde van die Amerikaanse deelstaat Minnesota, naby die stad International Falls. Die park se noordelike grens, wat oor 'n afstand van 55 myl strek, maak deel uit van die internasionale grens tussen die Verenigde State en Kanada.

Die park is in 1975 ter herdenking van die voyageurs gestig - Frans-Kanadese pelshandelaars wat die Noord-Amerikaanse binneland in die laat 17de eeu as eerste Europeërs deurdring het om handel met inheemse Indianestamme te dryf. Voor die koms van spoorweë het voyageurs met hul berkbas-kano's die vroeg-geïndustrialiseerde ekonomieë van Europa met die Steentydperk-ekonomieë van Amerika se Eerste Nasies verbind.[1]

Franssprekende Kanadese het handelsgoedere vanuit Montreal met groot kano's weswaarts na Grand Portage vervoer. Hier is die vrag oorgelaai na die kano's van ander voyageurs wat verder weswaarts gevaar het om handel met Indiane te dryf en Europese goedere vir pelse in te ruil. Hul handelsroete was een van die gevaarlikstes ter wêreld, met waterweë vol van uitdagende stroomversnellings.

Die park is veral gewild by hengelaars en watersportentoesiaste wat hier kajak-, kano- en ander boottoere onderneem. Die Kabetogama-skiereiland, wat heeltemal in die park geleë is en die grootste deel van sy landoppervlakte beslaan, is slegs per boot toeganklik. Die Boundary Waters Kanogebiedwildernis (Engels: Boundary Waters Canoe Area Wilderness) lê oos van die nasionale park.

Die Nasionale Voyageurs-park is vry van ligbesoedeling en het derhalwe 'n gewilde bestemming vir amateur-sterrekykers gewild. In 2020 sal die parkbestuur saam met die Voyageurs National Park Association (VNPA) aansoek om sertifisering as Dark Sky park doen.[2] Saam met ander parke soos Grand Canyon, Death Valley en Canyonlands sal die parkbestuur stappe neem om die park van volhoubare beligting te voorsien en die publiek in te lig oor die vermyding en vermindering van ligbesoedeling.

Verwysings[wysig | wysig bron]

  1. Sigurd F. Olson: Relics from the Rapids. In: National Geographic, volume 124, nommer 3, September 1963, bl. 415
  2. VNPA: Preserving Voyageurs National Park’s Starry Skies. Besoek op 6 November 2019

Eksterne skakels[wysig | wysig bron]