Nataliet

Nataliet is ‘n mengsel van etielalkohol en eter en is gebruik as ‘n plaasvervanger vir petrol in die aandrywing van binnebrandmasjiene.

Samestelling

Vroeg in die 20ste eeu is vasgestel dat ‘n geskikte motorbrandstof, waaraan die naam Nataliet gegee is, vervaardig kan word uit etielalkohol verkry uit melasse en eter. Melasse is ‘n afvalproduk van die Natalse suikerraffinaderye. Nataliet het bestaan uit 54% tot 60% amper suiwer etielalkohol en 45% tot 39% eter.

Eienskappe

Nataliet kan petrol vervang as brandstof in ‘n binnebrandmasjien sonder enige verstelling aan die vergasser en sonder die verlies aan werkverrigting. Met geringe verstellings aan die enjin kan dit selfs ‘n beter werkverrigting as petrol lewer. Nataliet het geen korroderende invloed op die metaaldele van die silinders en kleppe nie. By ekstreme temperature skakel ‘n motor wat op Nataliet ry makliker aan as ‘n motor aangedryf deur petrol. Sou Nataliet aan die brand slaan, kan die vlamme met water geblus word. Nataliet sal nie bevries nie. Die belangrikheid van alkohol as ‘n motorbrandstof lê in die feit dat dit vervaardig word uit hernubare bronne.

Geskiedenis

In 1917 (tydens die Eerste Wêreldoorlog) het die firma Natal Cane By-Products Ltd. die brandstof Nataliet vir vragmotors en die brandstof Union vir motors en motorfietse in hul fabriek in Mobeni in Natal begin maak. Weens die oorlog was petrol skaars en duur en Nataliet was veel goedkoper. Dit is daardie jare aan die spoorweë en die weermag verskaf en Union was selfs tot in 1981 in Natal te koop.

Bibliografie

• Denaturants for Ethanol/Gasoline Blends. Alternative fuels utilization program. US Department of Energy, April 1978. (op internet)
• Report 11 of the Federal Oil Conservation Boards of the President of the United States. US Department of the Interior, Januarie 1928. (op internet)