Paul Smit
Hierdie artikel is 'n weesbladsy. Dit is nie geskakel of in ander bladsye ingesluit nie. Help Wikipedia deur na moontlike teks te soek en 'n skakel hierheen te plaas. |
Paul J. Smit is ’n Afrikaanse skrywer van jeugverhale en ook skrywer van verskeie werke oor sportwetenskap en liggaamlike opvoeding. Smith skryf ook onder die skuilnaam Paul Jaco.
Lewe en werk[wysig | wysig bron]
Paul Jacobus Smit behaal in 1964 die B.A. Honneurs-graad en in 1965 die M.A.-graad in Liggaamlike Ontwikkeling aan die Universiteit van Pretoria, laasgenoemde met ’n verhandeling oor Die invloed van apnoïiese duike op sekere fisiologiese prosesse. In 1969 verwerf hy ’n Ph.D.-graad aan die Universiteit van die Witwatersrand met ’n proefskrif oor Anthropometric motor performance and physiological studies on South African children involved in a nutritional status survey.[1] Hy is vir lank betrokke by die Universiteit van Pretoria se Sportnavorsing-instituut en skryf verskeie artikels in vakkundige tydskrifte en hoofstukke in boeke oor menslike groei en geestelike ontwikkeling. As fiksheidsfanatikus het hy Tasmanië te voet deurkruis en het al geduik reg rondom die Suidkus van Afrika, die Middellandse See en in Australië[2]
Hy bly in Phalaborwa.
Skryfwerk[wysig | wysig bron]
Hy skryf die jeugreeks oor Die Paddaman, waarin ’n sportonderwyser ’n paar seuns leer diepseeduik en hulle dan spannende avonture beleef langs en in die water.
Onder die skuilnaam Paul Jaco skryf hy die jeugroman Die luiperds van Sh’ong wat handel oor die tiener Seevie, wat ’n passie het vir wildbewaring en op ’n plaas in Kwa-Violentia bly. Hy word groot as die seun van kolonel Merbe en Andrietti Bikoson, maar die raaisels oor sy familiegeskiedenis laat hom vermoed dat hy ’n aangenome kind is. Hy red ’n dagoud luiperdwyfie en noem haar Shuna. Sy help hom hierna in sy soeke na eie identiteit en in die proses van groot word. Daar is ook spanning tussen die plaaslike gemeenskap en ’n terroristegroep, waarby Seevie en sy meisie Tensy betrek word, met Shuma wat redding bring. Hierdie boek word ook in Engels vertaal.
Die South African Association for Sport Science, Physical Education and Recreation publiseer sy handleidings vir skoolleerlinge oor Homework in Physical Education en Experiments in Physical Education.
Publikasies[wysig | wysig bron]
Werke uit sy pen sluit in:[3]
Jaar | Publikasies |
---|---|
1959 | Die Paddaman |
1960 | Die Paddaman in die diepsee |
1962 | Die Fransman |
1964 | Die Paddaman se akwarium |
Gerrie en die smokkelaars | |
1965 | Die De Xaviers se nuwe vaderland |
Gerrie se kroon | |
Shongwaneskop | |
1979 | Groei en sport |
2008 | Die luiperds van Sh’ong (Paul Jaco) |
Vertalings | |
1958 | Moby Dick – Herman Melville |
Verwysings[wysig | wysig bron]
- ↑ Worldcat: http://www.worldcat.org/search?q=au%3ASmit%2C+Paul+Jacobus.&qt=hot_author
- ↑ NB-Uitgewers se outeursinligting: http://www.nb.co.za/Authors/6606 Geargiveer 12 Augustus 2016 op Wayback Machine
- ↑ Worldcat: http://www.worldcat.org/search?q=au%3ASmit%2C+Paul+Jacobus.&qt=hot_author