Radio France Internationale

in Wikipedia, die vrye ensiklopedie
Radio France Internationale se tak in Dar-es-Salam wat in swahili uitsaai

Radio France Internationale is 'n openbare Franse uitsaaidiens vir die buiteland, wat in 1931 onder sy oorspronklike naam Poste Coloniale gestig is. Die naam is in 1938 verander na Paris Mondial. Sedert die jaar 1975 staan die uitsaaidiens as Radio France Internationale (RFI) bekend. RFI maak aanvanklik deel uit van Radio France se dienste. In die herfs van 1983 word dit 'n outonome diens binne die Radio France-groep en word in 1987 'n selfstandige maatskappy, wat deur die Franse Departement van Buitelandse Sake gefinansieer word.

RFI se dienste is oorspronklik veral gemik op luisteraars in Afrikalande en saai in vyf tale uit (Frans, Engels, Spaans, Duits en Portugees).

Tydens die presidentskap van François Mitterrand begin RFI se dienste geleidelik op 'n wêreldwye skaal uitbrei en word ook in Oos-Europese en Asiatiese tale aangebied, en sy programme word nou ook vir gehore op die Noord- en Suid-Amerikaanse vastelande uitgesaai.

Die destydse voorsitter van RFI, Jean-Paul Cluzel, ontwikkel RFI in 1996 tot 'n nuusdiens wat wêreldwyd opgevang kan word, met programme in Frans en 19 ander tale.

Tans word RFI as kortgolfradio, op die internet en deur middel van talle satelliete en kabelradio wêreldwyd uitgesaai. Daarnaas beskik RFI oor mediumgolf- en FM-dienste in 'n aantal stede soos Parys, Berlyn, Koeweit-stad, Kinshasa en Maputo. Antoine Schwartz is in 2005 as die nuwe voorsitter van RFI benoem.

Eksterne skakels[wysig | wysig bron]