Reuben Riffel

in Wikipedia, die vrye ensiklopedie
Jump to navigation Jump to search
Reuben Riffel
Geboortenaam Reuben Riffel
Gebore 23 Desember 1974
Franschhoek, Wes Kaap
Nasionaliteit Suid-Afrika
Beroep Sjef
Huweliksmaat Maryke Riffel
Kind(ers) Twee

Reuben Riffel (gebore 23 Desember 1974) is 'n bekende Suid-Afrikaanse sjef, restaurateur en media-persoonlikheid. Hy is veral bekend vir sy TV-programme oor kos, advertensies, kookboeke en filantropiese werk.

Grootwordjare[wysig | wysig bron]

Reuben Riffel is in Franschhoek, Suid-Afrika,[1] gebore op 23 Desember 1974.[2] Hy is die tweede van drie kinders en het grootgeword in Groendal in die Franschhoekvallei.[3][4] Reuben het in 'n liefdevolle gesin grootgeword, waar kosmaak en lekker eet 'n belangrike rol gespeel het.[5]

Sy ma was op tye betrokke in die gasvryheidsindustrie terwyl sy pa in die bou- en konstruksiebedryf gewerk het. Sy ma het somtyds lekkernye tuis gebring van die restaurant waar sy werksaam was en dit is waar Reuben se smaak vir kwaliteit kos vlamgevat het.[6] Reuben het hoërskool bygewoon in die Paarl. Hy onthou dat hy veral handewerk geniet het.[7]

Loopbaan[wysig | wysig bron]

Riffel was vir 'n kort tydperk in die boubedryf werksaam, maar het gou oorbeweeg na die gasvryheidsindustrie waar sy eerste pos dié van 'n kelner was by die Chamonix-restaurant. Sy volgende skuif was na die rol van kroegman, maar dit was ook net tot eendag toe twee kombuispersoneellede nie opgedaag het nie, en hy daar vir hulle moes instaan. Hy het Chamonix verlaat om saam met sy oom in 'n nagklub te werk totdat hy in 1994, op die ouderdom van 20 jaar, besef het dat dit nie 'n werksomgewing was waarmee hy himself wou vereenselwig nie en eerder teruggegaan het na Chamonix.[2]

Onder leiding van Christoph Dehosse, het hy die kuns van voedselvoorbereiding geleer. Met Christoph se bedanking en vervanging deur Richard Carstens, is Riffel bevorder tot sous-chef waar hy die kuns van groentevoorbereiding, sousmaak en streng kombuisbestuur onder die knie gekry het.[4] Sy loopbaan het op 'n nederige noot begin en is gegrondves op die kernbeginsel van harde werk, wat hy eerstehands by sy mentors gesien het.[4]

Soos die noodlot dit wou hê, is Reuben, nadat sy kollega Richard Carstens een dag afwesig was van die werk, bevorder tot uitvoerende sjef – dit sonder enige waarskuwing. Hierdie geleentheid en uitdaging het in een van die vormingsgeleenthede van sy loopbaan ontaard: dis was tegelykertyd 'n groot mylpaal en 'n tyd vir groot besluite. Die klandisie by Chamonix het elke maaltyd waarvoor hy verantwoordelik was, hoog aangeskryf en daarna (toe Carstens nooit teruggekeer het nie) het hy permanent die rol van uitvoerende sjef beklee.

Hy herroep dat alles eers vir hom sin gemaak het toe 'n Franse toeris sy maaltyd, wat deur Reuben voorberei is, geprys het as “die beste maaltyd wat hy nog ooit geniet het”. Die gevoel wat hy op daardie oomblik beleef het, het hom tot die besef gebring dat hy beslis 'n sjef wou wees.[2]

Riffel het nie die sjefberoep deur enige formele kanale of studieprogramme betree nie. Hy het daarenteen 'n samestelling van natuurlike talent en ure se leer van familielede en beroemde kokke ingespan saam met sy harde werk, en sy sukses vandag kan daaraan toegeskryf word.

Hierna het hy by 'n hele paar restaurante gewerk en is herenig met sy mentor en voormalige kollega, Carstens, by Monneaux Restaurant in Franschhoek. Hier het hy sy vaardighede in die kombuis verder ontwikkel en het met 'n verskeidenheid bestanddele en teksture geëksperimenteer. Tydens sy oorsese reise in hierdie periode, het hy heelwat ervaring opgedoen wat hy teruggebring het na die kombuis toe. So het hy sy geloof in sy smaakpalet en sy kreatiewe kosmaakvermoëns versterk.

Na drie jaar by Monneaux[7] waar hy sy vaardighede verskerp het, het Reuben die geleentheid aangegryp om na Cambridge in Engeland te verhuis. Hy het daar 'n splinternuwe restaurant genaamd Bruno’s Brasserie aan die gang gesit en bedryf. Alhoewel die restaurant in 'n minder gegoede area geleë was, het dit gou baie klandisie gelok danksy Reuben se unieke en uitsonderlike disse.

In 2004 het vriende hom die geleentheid aangebied om terug te trek na sy tuisdorp, Franschhoek, om 'n restaurant genaamd Reuben’s (heel gepas na hom vernoem) te open. Hierdie restaurant was binne ses maande 'n groot sukses en dit is bevestig deurdat Reuben twee toekennings by Eat Out se Restauranttoekennings ontvang het: Sjef van die Jaar en Restaurant van die Jaar. Beide Reuben en sy restaurant se faam het deur dié gebeurtenisse nuwe hoogtes ingeskiet. Die oorspronklike Reuben’s is een van Franschhoek se beroemde kulinêre landmerke en lok steeds groot klandisie vanuit beide die plaaslike en internasionale mark.

Sy oog vir geleenthede om 'n breër gemeenskap te bederf met goeie kos, het daartoe gelei dat hy in 2009 'n tweede Reuben’s restaurant kon open in die vyfster boetiekhotel in Robertson, The Robertson Small Hotel. In 2010 het die geleentheid opgeduik vir Riffel om Gordon Ramsay restaurant, Maze, in die One&Only hotel in Kaapstad oor te neem. Reuben’s by die One&Only is gevestig met Reuben in die rol van uitvoerende sjef.[5] Aangesien die hotel hoë aansien geniet, bedien die restaurant slegs die room van plaaslike en internasionale gaste.

2013 was nog 'n skouspelagtige jaar in Reuben se loopbaan. Tydens hierdie jaar het twee nuwe restaurante die lig gesien: 'n vyfster gastehuis in Paternoster genaamd Abalone House,[8] asook Racine, 'n bistro-tipe restaurant op die Chamonix wynlandgoed in Franschhoek.[9]

Eenvoud is Riffel se filosofie – dit bring die bestanddele se natuurlike geure uit. Tesame daarmee moet 'n mens volgens hom daarna streef om die perfekte balans in die einddis te bewerkstellig, sonder om dinge te kompliseer. Hy het tydens 'n onderoud met die Wall Street Journal erken dat hy meer as 250 kookboeke besit, bloot omdat hy steeds elke dag aanhou leer, eksperimenteer en nuwe geurgevulde disse optower.[10]

Reuben bly steeds eerstehands betrokke by sy restaurante en verdeel sy werksure tussen die verskillende eetplekke.

Restaurante[wysig | wysig bron]

Jaar Oopgemaak Restaurant Ligging
2004 Reuben's Restaurant Franschhoek
2009 Reuben's Restaurant Robertson Small Hotel in Robertson[8]
2011 Reuben's Restaurant One&Only Hotel, Victoria & Alfred Waterfront
2013 Reuben’s Restaurant Abalone House, Paternoster
2013 Racine Chamonix, Franschhoek[9]

Televisie[wysig | wysig bron]

Reuben het al op verskeie televisieprogramme en kookprogramme verskyn. Hy het in 2011 New York besoek, waar hy verfilm is vir verskynings in die Martha Stewart Show en The Today Show.[10]

In Junie 2012 was hy 'n gasbeoordelaar in die tweede Suid-Afrikaanse MasterChef-televisiereeks – 'n realiteitsreeks en soektog na Suid-Afrika se beste amateursjef.

Reuben het in 2013 5 Sterre met Reuben, sy eerste Afrikaanse kookprogram, aangebied waartydens hy kykers touwys gemaak het in die tuisvoorbereiding van vyfsterdisse.[11]

In 2014, met die aanvang van MasterChef South Africa se derde seisoen, het hy in Andrew Atkinson se plek die rol van permanente beoordelaar ingeneem.[12] Saam met Pete Goffe-Wood en Benny Masekwameng het Riffel deel uitgemaak van die beoordelaarspaneel vir hierdie reeks asook die 2015 Celebrity MasterChef-reeks.

Riffel is die kenmerkende gesig vir Robertson se kruie en speseryereeks (Robertson’s herbs and Spices) en bied 'n reeks televisie-advertensies aan waarin hy verskillende resepte met die Robertson-produkte demonstreer. Reuben is ook die handelsmerk-ambassadeur vir die Suid-Afrikaanse been van Samsumg Home Appliances.[12]

Boeke[wysig | wysig bron]

Hy het drie topverkoper-boeke uitgegee saam met Quivertree Publications:[13]

  • Reuben Cooks: Food is time travel (2008) ISBN 978-0-9802651-5-6 - “Food is Time travel” is 'n versameling van Reuben se gunsteling resepte vanuit al die uithoeke van die wêreld.
  • Reuben Cooks Local (2011) ISBN 978-0-9869813-5-7 – Hierdie kookboek is 'n versameling van Reuben se gunsteling Suid-Afrikaanse feesmaaltye en fokus op eenvoudig-geskrewe resepte en plaaslik-bekombare bestanddele.
  • Braai: Reuben on Fire (2013) ISBN 978-0-9870284-5-7 – Hierdie kookboek weerspieël die tydlose Suid-Afrikaanse kosmaakstyl.

Toekennings[wysig | wysig bron]

Reuben is in 2004 bekroon met die SA Chef of the Year-toekenning vir sy oorspronklike werk en vindingryke kosmaakstyl . Sy Franschhoek-restaurant het in dieselfde jaar Eat Out se Restaurant of the Year-toekenning ontvang.[5] Hierdie restaurant het daarby nog drie jaar in 'n ry (2004–2006) die Eat Out Johnnie Walker Restauranttoekenning ontvang. Reuben self het in 2007 Unilever se uitsonderlike Sjef van die Jaar-toekenning ontvang.[12]

Persoonlike lewe[wysig | wysig bron]

Reuben is getroud met Maryke. Hulle het ontmoet terwyl hy werksaam was by Monneaux. Hulle het twee jong kinders. Die Riffel-gesin woon in Franschhoek in Suid-Afrika. Reuben het 'n groot liefde vir motorkarre en mag dalk op die dorp gewaar word in sy klassieke rooi Mercedes Benz.

Liefdadigheid en gemeenskapsbetrokkenheid[wysig | wysig bron]

Reuben ondersteun talle plaaslike liefdadigheidsorganisasies en -aangeleenthede. Dit sluit sy samewerking met ander bekende sjefs insluitende Margot Janse, Neil Jewell en Duncan Doherty in 2012 in. Hulle het deelgeneem aan die Celebrity Chefs Challenge Dinner. Hierdie geleentheid is aangebied om geld in te samel vir die Peninsula Schools Feeding Association (PSFA) se voedingskema, wat honger in skole beveg.[14] Reuben is betrokke by verskeie organisasies buiten die PSFA, insluitende Hope Through Action, die Hospice en die Pinotage Young Development Agency (PYDA). Hierby is hy ook een van die Paarlskool ('n skool vir serebraalgestremde kinders) se ambassadeurs.[12] Van die noemenswaardige liefdadigheidsgeleenthede wat Reuben in 2015 aangebied het, sluit die Chef Reuben Riffel liefdadigheidsgolfdag[15] (ten bate van die Franschhoek Hospice) asook die Stop Hunger Now South Africa liefdadigheidsete in.

Verwysings[wysig | wysig bron]