Rina Botha

Rina Botha was ’n Afrikaanse aktrise en skrywer en lektor in Drama aan die Universiteit van Stellenbosch.

Lewe en werk

Catharina Philippina Botha is in 1925 in George gebore. Sy studeer aan die Universiteit van Stellenbosch en die Graaff-Reinet Onderwyskollege en gee daarna onderwys op Sutherland. In 1944 verlaat sy die onderwys om aktrise te word. Sy sluit aan by die akteur Johan Fourie se toneelgeselskap en trou later met hom. Vir twaalf jaar is sy aan die Johan Fourie-toneelgeselskap verbonde en doen ook werk vir die Nasionale Toneelorganisasie. In 1964 keer sy terug na die Universiteit van Stellenbosch om drama te studeer onder Fred Engelen en sy voltooi ook ’n B.A. Honneurs-graad in Afrikaanse letterkunde. Hierna word sy aangestel as lektor in spraak en stem in die Departement Drama, ’n pos wat sy beklee tot met haar dood. In hierdie tyd lei sy vele bekende akteurs en aktrises op, insluitende Annalize van der Ryst, Rina Nienaber, Johan Esterhuizen, Antoinette Kellerman, Dawie Malan, Laurika Rauch, Juanita Swanepoel en Marie Kruger, laasgenoemde twee wat haar opvolg as stemonderwysers in die departement. Van die rolle wat sy op die verhoog vertolk het, sluit in ’n rol in “Geknakte riete” van Johan Fourie in 1952. Haar tweede man, Carel “Yster” Hattingh, is in 1970 oorlede.

Skryfwerk

Sy skryf die romans “Amanda Conradie”, “Totdat ons weer ontmoet” en “Drakensnek”. Sy skryf ook ’n aantal ontspanningsverhale, waarvan sommige in Die Naweek gepubliseer word.

Publikasies

Jaar	Publikasies
1950	Amanda Conradie
	Totdat ons weer ontmoet
1952	Drakensnek

Bronnelys

Boeke

• Aucamp, Hennie “Bly te kenne” Tafelberg-Uitgewers Bpk. Kaapstad Eerste uitgawe 2001
• Nienaber, P.J.; Senekal, J.H en Bothma, T.C. “Mylpale in die geskiedenis van die Afrikaanse letterkunde”
• Afrikaanse Pers-Boekhandel Tweede hersiene uitgawe 1963
• Van Coller, H.P. (red.) “Perspektief en Profiel Deel 2” J.L. van Schaik-Uitgewers Pretoria Eerste uitgawe 1999

Internet

• Esat: http://esat.sun.ac.za/index.php/Rina_Botha