Salma Hayek

in Wikipedia, die vrye ensiklopedie
Salma Hayek
'n Beeld van die betrokke persoonlikheid.
Salma Hayek in 2012

Geboortenaam Salma Hayek Jiménez
Geboorte 2 September 1966 (1966-09-02) (57 jaar oud)
Coatzacoalcos, Veracruz, Meksiko
Nasionaliteit Meksiko, Verenigde State van Amerika
Beroep(e) Aktrise, rolprentvervaardiger, gewese fotomodel
Aktiewe jare 1988 tot hede
Rolprente Frida

Salma Hayek Pinault (née Hayek Jiménez; * 2 September 1966) is 'n Meksikaans-Amerikaanse aktrise, rolprentvervaardiger en gewese fotomodel. Hayek het haar loopbaan in Meksiko met 'n rol in die telenovela Teresa begin en later in die rolprent El Callejón de los Milagros (Engelse titel: Miracle Alley) verskyn, waarvoor sy deur die Academia Mexicana de Arte y Ciencias Cinematográficas (AMACC) vir 'n Ariel-prys genomineer is. In 1991 het Hayek haar in Hollywood gevestig waar sy bekendheid verwerf het vir haar rolle in rolprente soos Desperado (1995), From Dusk till Dawn (1996), Dogma (1999) en Wild Wild West (1999).

Haar groot deurbraak het in 2002 met die rolprent Frida gekom waarin sy die hoofrol as die Meksikaanse skilderes Frida Kahlo vertolk het. Hiervoor is Hayek in die kategorie "Beste aktrise" vir 'n Academy Award, BAFTA Award, Screen Actors Guild Award en Golden Globe Award genomineer. Die rolprent, wat groot belangstelling gewek het en gunstig deur kritici ontvang is, was 'n kommersiële sukses.

Haar regiewerk vir The Maldonado Miracle is in 2004 met 'n Daytime Emmy Award in die kategorie "Kinder/Jeug/Gesin" bekroon. Drie jaar later is sy vir haar rol in ABC se komiese televisiedramareeks Ugly Betty vir 'n Emmy Award as "Uitstekende gas-aktrise in 'n komediereeks" genomineer. Tussen 2009 en 2013 het sy daarnaas as gas-aktrise in NBC se komediereeks 30 Rock opgetree. Meer onlangse filmprojekte sluit Grown Ups (2010), Puss in Boots (2011), Grown Ups 2 (2013), Tale of Tales (2015) en The Hitman's Bodyguard (2017) in.