Savile Row

in Wikipedia, die vrye ensiklopedie
Jump to navigation Jump to search
11 Savile Row
Die Britse model David Gandy in 'n manspak wat deur die kleremakers Henry Poole & Co. na maat vervaardig is

Savile Row [ˌsævɪl ˈroʊ] is 'n straat in die Sentraal-Londense stadsdeel Mayfair, City of Westminster wat tradisioneel met maatklere vir mans verbind word. In sy lang en gevarieerde geskiedenis het die straat daarnaas ook die hoofkwartier van die Royal Geographic Society in 1 Savile Row gehuisves waar belangrike Britse verkenningstogte na Afrika en die Suidpool beplan is, en meer onlangs die Beatles se Apple Corps-kantoor in 3 Savile Row. Tydens 'n konsert op dié gebou se dak was die befaamde Britse popgroep vir die laaste keer in lewende lywe te sien.

Die straat, wat oorspronklik as Savile Street bekendgestaan het, het tussen 1731 en 1735 as deel van die Burlington Estate-eiendomsprojek ontstaan. Sy ontwerp is beïnvloed deur die Anglo-Ierse Burlington-familie se interpretasie van Palladiaanse boukuns waarna as Burlingtoniaanse argitektuur verwys word. Die hoofargitek was Henry Flitcroft wat onder toesig van Daniel Garrett gewerk het, alhoewel enkele geboue (1 en 22-23 Savile Row) deur William Kent ontwerp is. Aanvanklik is hier veral militêre offisiers met hul vroue gehuisves, maar later het ook bekende persoonlikhede soos William Pitt die Jongere en die toneelskrywer en Laerhuis-afgevaardigde Richard Brinsley Sheridan in Savile Row ingetrek.

Vanaf die laat 18de eeu het Londense kleremakers hul besighede in die buurt begin vestig - aanvanklik, omstreeks 1790, in Cork Street, en later, vanaf 1803, ook in Savile Row. In 1846 het Henry Poole, wat later as die skepper van die tuxedo-kostuum bekendheid sou verwerf, 'n ingang in Savile Row tot sy ateljee in Old Burlington Street geopen.

Die Engelse term bespoke, wat na voortreflike kleremakerskuns verwys, het sy oorsprong in Savile Row en verwys tans na 'n manspak wat na die maat van die klant gesny en vervaardig word. In 1969 het die klerewinkel Nutters of Savile Row die tradisionele styl en benadering van Savile Row-kleremakers by die moderne smaak aangepas. So is in die 1990's na die styl van ontwerpers soos Richard James, Ozwald Boateng en Timothy Everest as New Bespoke Movement verwys.

Die stadsraad van Westminster het in November 2016 'n nuwe beleid afgekondig om die historiese karakter en identiteit van Savile Row met sy klein kleremaker-ondernemings teen ekonomiese druk en mededinging deur winkels van globale handelsmerke te beskerm.[1]

Verwysings[wysig | wysig bron]

Eksterne skakels[wysig | wysig bron]