Shetland

Sealtainn / Isles of Shetland
Shetland-eilande

(Vlag van Shetland) (Landswapen van Shetland)
Land	Skotland
Amptelike tale	Engels, Skots-Gaelies
Hoofstad	Lerwick 60°09′N 01°09′W
Grootste stad	Lerwick
Aantal eilande (waarvan bewoon)	100 (15)
Grootste eiland	Mainland (967 vk km)
Administrasie	Skotse raadsgebied (council area)
Plaaslike raad	Raad van die Shetland-eilande
Regeringsparty	Onafhanklikes
Oppervlakte  - Totaal  - % water	1 466 vk km - %
Bevolking   2012 (skatting)  - Bevolkingsdigtheid	23 210 15/vk km
Inlywing by Noorweë	Geannekseer in 1195
Inlywing by Skotland	Geannekseer in 1469
Tydsone	UTC +0

Shetland (Skots-Gaelies: Sealtainn; Engels: Isles of Shetland of Shetland Islands; Noors: Hjaltland) is 'n Skotse eilandgroep wat uit die hoofeiland Mainland en naastenby 100 kleiner eilande bestaan. Shetland word deur die Noordsee van die Skotse eilande Orkney geskei en in die noorde lê die Deense Faroëreilande. Die grootste nedersetting en administratiewe sentrum is Lerwick. Shetland is tussen die Noorse See in die noorde en die Noordsee in die suide geleë; albei behoort tot die Atlantiese Oseaan.

Satellietbeeld van Shetland

In administratiewe opsig vorm Shetland een van die 32 raadsgebiede (council areas) van Skotland en 'n kiesafdeling van die Skotse parlement.

Shetland word reeds sowat 5 500 jaar lank deur mense bewoon. Die eerste bewoners was Neolitiese stamme en later Pikte totdat die eilandgroep in 1195 ná 'n Wiking-inval deur Noorweë geannekseer en deur Noorse setlaars gekoloniseer is. In 1469 is Orkney deur die Skotse Kroon geannekseer nadat 'n bruidskat nie betaal is nie. Na Shetland is die Suidelike Shetlandeilande, 'n Britse oorsese gebied in die Suid-Atlantiese Oseaan genoem.

Klimaat

Danksy die invloed van die warm Golfstroom word Shetland deur 'n gematigde, maar vogtige seeklimaat gekenmerk. Die Golfstroom vloei in noordoostelike rigting aan die wateroppervlak van die Atlantiese Oseaan en bring ook warm lugmassas uit die gebied van die Golf van Mexiko saam sodat Shetland se gemiddelde temperature nie sy noordelike ligging weerspieël nie.

Die verskil tussen die gemiddelde temperature van somer en winter beloop minder as 10 °C – tydens die relatief milde winters daal die kwik tot 'n gemiddelde temperatuur van tussen 0 en 5 °C, terwyl in die somer 'n gemiddelde van 10 °C aangeteken word. Maksimum-temperature is nie hoër as 19 °C nie.

Eksterne skakels

• Wikimedia Commons het meer media in die kategorie Shetland.
• (en) Toerisme-inligting oor Shetland op Wikivoyage
• (en) Amptelike webwerf
• (en) "Shetland Islands". Encyclopædia Britannica. Besoek op 4 April 2020.