Sigurd Ring
| Sigurd Ring | |
|---|---|
| Legendariese koning van Swede en moontlik Denemarke | |
| Bewind | 8ste eeu? |
| Voorganger | Harald Oorlogtand |
| Opvolger | Ragnar Lodbrok |
| Kinders | Ragnar Lodbrok |
| Koningshuis | Huis van Munsö |
| Vader | Randver of Ingjald |
| Moeder | Åsa Haraldsdotter of suster van Harald Oorlogtand |
| Godsdiens | Oudnoorse godsdiens |
Sigurd Ring (Oudnoors: Sigurðr Hringr, in sommige bronne net Hringr genoem)[1] was 'n legendariese Sweedse koning[2] wat in baie Oudskandinawiese sagas genoem word.
Volgens dié bronne het hy heerskappy oor Swede gekry as 'n vasalkoning onder sy oom Harald Oorlogtand. Later sou hy teen sy oom veg in 'n poging om hom omver te werp vir die troon van Denemarke, 'n konflik wat Sigurd eindelik gewen het ná die legendariese Slag van die Brávellir, waar Odin self na bewering tussenbeide getree en Harald doodgemaak het.
In die sagas is Sigurd ook bekend as die vader van die Noorse Wikingheld en koning van Denemarke en Swede Ragnar Lodbrok. Volgens Bósa saga ok Herrauds was daar eens 'n saga oor Sigurd Ring, maar het dit verlore gegaan.[3][4]
Historiese oorsprong
[wysig | wysig bron]
Daar is al voorgestel dat 'n verslag oor 'n stryd om die Deense troon kon gelei het tot die legende van Sigurd Ring. Ná die dood van Hemming van Denemarke in 812 het 'n burgeroorlog uitgebreek tussen sy broer en neef Sigfred en Anulo. Dié Anulo was die neef of kleinseun van 'n vroeëre koning Harald. Die twee het geveg om die troonopvolging wat tot albei se dood gelei het.[5] Sigfred en Sigurd word dikwels saamgesmelt in Middeleeuse geskrifte. Anulo kon oorspronklik die Oudnoorse Ánleifr of Áli verteenwoordig het, maar dit is dalk deur kroniekskrywers verkeerd verstaan vir die Latynse annulus, wat "ring" beteken.[6] Saxo Grammaticus en sommige ander Middeleeuse samestellers van koningslyste het duidelik die name Sigfred/Sigurd en Anulo/Ring in een persoon saamgesmelt nadat hulle kennis oor 9de-eeuse geskiedenis verkry het uit die kronieke van Adam of Bremen (omstreeks 1075). Die twee se historiese opvolger, Ragnfred (bewind: 812-813), is deur Saxo verwar met die Wikingleier Ragnar Lodbrok, wat geïdentifiseer word as die seun van Sigurd Ring.[7] Die Deense lys van vroeë konings van die Wikingtydperk is dus deels 'n Middeleeuse konstruksie.[8]
Een moontlikheid is dat die slag van 812 weerspieël word in die legendariese Slag van die Brávellir, wat deur Sigurd Ring, nefie van Harald Oorlogtand, geveg is.[9] Ander geleerdes het voorgestel dat die oorspronklike naam van die heerser Ring was en dat hy die historiese koning van die Swede was en die slag in die 9de eeu gewen het teen 'n Deense of Oos-Gautiese mag.[10]
Nog ander beskou die geveg as mities.[11] Moderne Sweedse geleerdes is skepties om 'n chronologie saam te stel uit die inligting van die Middeleeuse letterkunde en erken nie die historiese egtheid van Sigurd Ring of die Brávellir-geveg nie.[12]
Verwysings
[wysig | wysig bron]- ↑ soos in Lejrekroniken, Gesta Danorum, en die Saga van Orvar-Odd; sien Nerman (1925), p. 246-50.
- ↑ Katarina Harrison Lindbergh, Nordisk mytologi från A till Ö.
- ↑ Nerman (1925), p. 250.
- ↑ J. Butler, "The real Ragnar Lodbrok", Historic UK.
- ↑ Jessen (1862), p. 13-29.
- ↑ Storm (1877), p. 396.
- ↑ Storm (1877), p. 391-9.
- ↑ Smyth (1977), p. 1-4.
- ↑ Jessen (1862), p. 35.
- ↑ Nerman (1925), p. 256-7, 261.
- ↑ Reallexikon, Vol. 13 (1999), p. 645-7
- ↑ Harrison (2002), p. 23.
Bronne
[wysig | wysig bron]- Harrison, Dick (2002) Sveriges historia: medeltiden. Stockholm: Liber.
- Jessen, C.A.E. (1862) Undersøgelser til nordisk oldhistorie. København: Otto Schwartz's Boghandel.
- Nerman, Birger (1925) Det svenska rikets uppkomst. Stockholm: Generalstabens Litografiska Anstalt [Föreningen för Svensk Kulturhistoria, Böcker, N:o 6].
- Reallexikon der Germanischen Altertumskunde, Vol. 13 (1999). Berlin: de Gruyter.
- Smyth, Alfred (1977) Scandinavian kings in the British Isles 850-880. Oxford.
- Storm, Gustav (1877) "Ragnar Lodbrok og Lodbrokssønnerne; Studie i dansk Oldhistorie of nordisk Sagnhistorie", Historisk Tidskrift 2:1 [1]
Skakels
[wysig | wysig bron]
Hierdie artikel is in sy geheel of gedeeltelik uit die Engelse Wikipedia vertaal.
| Voorganger ← Harald Oorlogtand |
Legendariese Sweedse koning | Opvolger Ragnar Lodbrok → |