Slagtersnek-monumente

in Wikipedia, die vrye ensiklopedie
Jump to navigation Jump to search

Die Slagtersnek-rebellie word deur vier gedenktekens in herinnering geroep. Hulle het 'n beduidende rol gespeel in die ontwaking van Afrikaner-nasionalisme.

Freek Bezuidenhout[wysig | wysig bron]

Prof. dr. S.P. Engelbrecht.

Op 10 Oktober 1815 is Frederik Cornelis (Freek) Bezuidenhout op die plaas Silverbrook langs die Baviaansrivier deur 'n pandoer doodgeskiet. By die klipskeur waarin Bezuidenhout geskuil het, is 'n monumentjie opgerig en op sy graf lê 'n granietblok. Die twee gedenktekens is ongveer 200 m van mekaar geleë en 16 km noord van die historiese plaas Glen Lynden op die pad tussen Bedford en Tarkastad. Die oprigting van die monumente en die ontwikkeling van die terrein was op aanbeveling van dr. E.G. Jansen en prof. S.P. Engelbrecht. P.S.M. de Klerk, 'n boer van die kontrei, het die ontwerp gedoen en die eerste steen is op 10 Oktober 1946 deur prof. J.C. van Rooy voor 'n skare van 400 gelê. Sedertdien is die feesterrein o.a. gebruik vir volksfeeste op Krugerdag, Heldedag en Geloftedag gereël deur die Reddingsdaadbond, die Voortrekkers en Rapportryers. Op 30 Oktober 1949 het Voortrekker-eeufeesvierings hier plaasgevind. Die NG gemeente Glen Lynden (Bedford) is eienaar van die terrein.

Hans Bezuidenhout[wysig | wysig bron]

Op 10 Oktober 1972 het die Rapportryers van Tarkastad 'n gedenkteken aan Johannes Jurgen (Hans) Bezuidenhout onthul.

Gedenknaald[wysig | wysig bron]

Ongeveer 10 km suid van Kookhuis (Cookhouse) op die plaas en by die spoorweghalte Long Hope, op die pad van Cradock na Port Elizabeth staan 'n eenvoudige gedenknaald wat die vyf vryheidsvegters herdenk wat op daardie plek tereggestel is. Die naald is opgerig met geldelike bydraes deur die publiek en onthul op 9 Maart 1916, presies 'n eeu na die tragiese gebeure daar. By die geleentheid was die sprekers dr. D.F. Malan en ds. M.L. de Villiers, toe predikant te Bedford en latere toonsetter van Die Stem. De Villiers se lied Slagtersnek is by hierdie onthulling vir die eerste maal deur 'n koor uitgevoer. Op 26 September 1938 tydens die Simboliese Ossewatrek is 'n Voortrekkerwa hier verby en is kranse aan die voet van die naald gelê. Die werklike Slagtersnek is 16 km noord van hierdie punt.

Bibliografie[wysig | wysig bron]

  • Van der Merwe, Gerdrie: Deur dít alles het die Here ons gedra. Nederduitse Gereformeerde Gemeente Glen Lynden (Bedford) 1829–1979. Bedford: Die Kerkraad, 1979.