Spätzle

in Wikipedia, die vrye ensiklopedie
Spätzle mat Ënnen (Spätzle met uie) uit Luxemburg.

Spätzle (soms ook Spätzli, Spatzen en Spätzla genoem) is 'n bekende soort vermicelli uit die Alemanniese kookkuns van Suid-Duitsland, die Duitstalige Switserland, die westelike Oostenryk en die Elsas. Die oorspronklike Swabiese woord is eintlik 'n verkleiningsvorm van Spatz (mossie). Spätzle word saam met sous as 'n hoofgereg bedien.

Spätzle word gewoonlik net soos ander pastageregte uit 'n deeg van meel, eiers, sout en water gemaak. Af en toe word die water deur 'n groter aantal eiers vervang. In teenstelling met ander soorte pasta is die Spätzledeeg baie vogtig en pap. Dit kan dus nie uitgerol word soos ander soorte deeg nie, aangesien dit maklik sal skeur. Die deeg word vanuit 'n spesiale Spätzle-rasper as dun strepies regstreeks in kokende soutwater geplaas. Spätzle neem net enkele minute om klaar te kook en styg dan na bo waar hulle met 'n lepel afgeskep kan word. Om bereiding te vergemaklik, is spesiale metaalskawe en -perse beskikbaar.