Groot Markplein van Brussel: Verskil tussen weergawes

Wysiging soos op 18:58, 7 Februarie 2009

Die Grote Markt is die sentrale stadsplein in Brussel. Dit word omring deur gildehuise, die stadsaal en die Broodhuis. Die plein is Brussel se belangrikste toeristebestemming en saam met die Atomium en Manneken Pis een van die stad se gewildste landmerke.

Geskiedenis

Die Grote Markt het reeds in die elfde eeu die sentrum van die stad gevorm. Dit is aangelê op die plek van 'n drooggelegde moeras: 1,2 m laer as die huidige plein.

Die stadsaal is tussen 1402 en 1455 gebou; die oorspronklike argitek was moontlik Jacob van Thienen. Die gotiese toring was ontwerp deur Jan van Ruysbroeck. Bo-aan die 97 m-lange toring staan 'n standbeeld van die aartsengel Michiel, Brussel se beskermheilige, wat 'n draak verslaan.

Die Broodhuis se voorganger is ook in die 13de eeu gebou: 'n houtgebou waar bakkers hulle brood in 'n bedekte mark verkoop het (vandaar die naam). In die 15de eeu is die houtgebou met 'n steengebou vervang en gebruik vir die administrasie van die Hertog van Brabant. Met die val van die hertogdom aan die Huis van Habsburg het die gebou ook bekend geword as Maison du Roi ("die Koning se huis"), wat tans steeds die Franse benaming vir die gebou is. Tydens sy heerskappy in die 16de eeu het Karel V die gebou weereens laat herbou, die keer in 'n Gotiese styl, eenders aan die huidige voorkoms. Die stad het in 1873 aan Victor Jamaer opdrag gegee om die gehawende struktuur in 'n neo-gotiese styl op te knap, 'n taak wat uiteindelik twintig jaar sou duur.

Die Grote Markt is na die konstruksie van die stadsaal vir die eerste keer uitgelê, in die middel van die stad se destydse kommersiële distrik. Die aangrensende strate weersprieël steeds die area se oorsprong, met name soos "Haringstraat", "Grasmarkt", "Boterstraat", "Hoedenmakersstraat", ens. Die oorspronklike Grote Markt was 'n mengelmoes van geboue wat tussen die 15de en 17de eeu in allerlei style opgerig is.

Op 13 Augustus 1695, tydens die Negejarige Oorlog, het 70 000 Franse troepe, onder leiding van maarskalk François de Neufville met 'n bombardering van Brussel begin, in die hoop om die sogenaamde "Liga van Augsburg" se magte weg te trek van hul belegering van die Frans-besette stad Namur (in die suide van die huidige België). Die Franse het met kanonne en mortiere van die hoofsaaklik weerlose stad gevuur: die stad het vlam gevat en die grootste deel van die Grote Markt en omliggende stadsdele is vernietig. Slegs die steenskelet van die stadsaal en fragmente van 'n paar ander geboue het staande gebly. Dit is ironies dat daar hoegenaamd iets van die stadsaal oorgebly het, siende dat dit die hoofteiken van die bombardering was.

Die plein is in die volgende vier jare herbou deur die stad se gildes. Hulle pogings is deur die stad se raadslede en die Goewerneur van Brussel gereguleer en hulle planne moes eers deur hierdie amptenare goedgekeur word. Die resulterende Grote Markt het 'n harmoniese uitleg gehad, ten spyte van die oënskynlike botsende kombinasie van Gotiese, Barok- en Lodewyk XIV-style.

UNESCO het die plein in 1998 tot 'n Wêrelderfenisgebied verklaar.

'n Panorama van die Grote Markt

Blomtapyt

Die Grote Markt is bekend vir sy groot "blomtapyt". 'n Uitgestrekte "tapyt" uit begonias word elke twee jaar vir 'n paar dae in die middel van Augustus vertoon en is 'n groot trekpleister vir toeriste.^[1]