Cannes

Uitsig oor Cannes

Cannes (Oksitaans-Provençaals Cano of Canas) is 'n stad in die département Alpes-Maritimes (Suid-Frankryk) met sowat 70 000 inwoners. Die stad lê aan die Côte d'Azur, die gewildste kusstreek van die land met talle vakansieoorde. Die stad verwerf internasionale bekendheid deur die Internasionale Filmfees wat jaarliks in Mei plaasvind.

Geskiedenis

Die Franse woord "Cannes" beteken "riete" in Afrikaans. In die gebied, wat deur moeras en riet oorheers word, rig die Romeine 'n vesting op die huidige Mont Chevalier op, wat hulle Castellum Marsellinum noem.

Omtrent 410 n.C. stig die heilige Honoratus, die seun van 'n Romeinse amptenaar uit die stad Trier, 'n klooster op St. Honorat, een van die Leriniese Eilande langs die kus van Cannes. Die abdy, wat as Lérins bekend staan, word in die vroeë middeleeue 'n beroemde sentrum van die Latynse kultuur en 'n belangrike instelling vir die onderwys van 'n aantal bekende sendelinge. In die jaar 660 aanvaar die klooster die Benediktynse reëls. Die kloostereiland word in 732 deur Arabiere verower, en die monnike verlaat die eiland. In die 10de eeu word die abdy herstel.

In die 11de eeu bestaan 'n klein visserdorpie met 'n madonnakapel in die duine.

Vanaf die middeleeue tot by die vroeë dertigerjare van die 19de eeu bly Cannes 'n klein visserdorp. Die voormalige Britse minister van Finansies en Ekonomiese Sake, Lord Henry Peter Brougham (1778-1868), is die eerste bekende persoonlikheid wat hom in 1834 in die dorp vestig. Ook Franse en buitelandse adellikes begin die natuurskoon van die omgewing geniet en rig hier hulle vakansiehuise op. In 1870 is daar 215 villa's en 34 hotelle.

Die stad is vandag nog steeds 'n gewilde speelplek van die rykes en bekendes. In 1868 ontstaan die Croisette, die bekende kuslaan van Cannes, en vanaf 1912 word talle luukse hotelle langs die laan opgerig. Die tradisie van die Internasionale Filmfees neem in 1946 'n aanvang.

Besienswaardighede

Uitsig oor Cannes, soos gesien vanuit La Castre

• Die Hotel Carlton, 'n spierwit gebou langs die boulevard de la Croisette, word kort voor die Eerste Wêreldoorlog opgerig en dien aanvanklik as 'n hospitaal. In 1922 vind hier 'n vredeskonferensie plaas. Maar dit staan veral bekend as die plek waar in 1954 Alfred Hitchcock se rolprent "To Catch A Thief" ontstaan, en hier ontmoet die Amerikaanse rolprentster Grace Kelly vir die eerste keer haar toekomstige eggenoot vors Rainier van Monaco.
• St. Honorat se huidige abdy ontstaan in die 19de eeu; sedert 1869 is dit 'n klooster van die Sistersiënsers. Die abdy en eiland bekoor met sy olyfbome, wingerde en laventelbosse.
• Die eiland Ste. Marguerite staan bekend vir sy bosse met eukaliptus, seeden en denneboom. Die wandelpaaie op die eiland behandel verskeie ekologies-botaniese onderwerpe. Die ou vesting, wat in die 17de eeu deur die Franse boumeester Vauban versterk is, is sedert 1737 'n staatsgevangenis.
• Die Musée de la Castre, 'n volkskunde-museum, bied as toegif 'n pragtige uitsig oor die hawe, die blou see en die eilande langs die kus.