Sharpeville

Sharpeville is 'n woonbuurt van Vereeniging, Republiek van Suid-Afrika, sowat 50 kilometer ten suide van Johannesburg, in die huidige provinsie Gauteng (vroeër Transvaal).

Die buurt, wat na John Sharpe, 'n burgemeester van Vereeniging vernoem is, word op 21 Maart 1960 die toneel van die sogenaamde Sharpeville-slagting, waarvan die internasionale gemeenskap met skok kennis neem en wat aanleiding gee tot landwye onluste.

Daar is beweer dat die Swart betogings in Sharpeville tot 'n paniekbevange reaksie deur die polisie gelei het, 'n geregtelike ondersoek het egter aangetoon dat die meerderheid van die 69 mense wat gedood is, van agter geskiet is.

Die regering van Hendrik Verwoerd verklaar 'n noodtoestand en plaas 'n verbod op die African National Congress en die Pan-Afican Congress van Robert Sobukwe.

Nelson Mandela laat daaropvolgens sy beleid van vreedsame verset vaar en stig die ANC se militêre vleuel, die Umkhonto we Sizwe.