Stiftsgymnasium Melk

Hierdie artikel bevat nie ’n bronnelys nie, wat beteken dat die inhoud nie geverifieer kan word nie.
Enige bevraagtekende inligting mag dus ook mettertyd verwyder word. Help Wikipedia deur betroubare bronne tot die artikel by te voeg.

Die Stiftsgymnasium Melk (volledige amptelike naam Öffentliches Stiftsgymnasium und Oberstufenrealgymnasium der Benediktiner in Melk) is 'n humanistiese gimnasium wat as privaat skool deur die Benediktyne-abdy van Melk in die Oostenrykse deelstaat Neder-Oostenryk bedryf word en ook in die abdy-kompleks gevestig is. Die skool geniet Oostenrykse Öffentlichkeitsrecht ("openbare reg"), dit wil sê sy eindsertifikate is gelykgestel aan dié van openbare skole.

In sy huidige vorm bestaan die abdy-gimnasium sedert 1707, maar dit het sy oorspronge in 'n kloosterskool wat reeds in die Middeleeue gevestig is. Die gimnasium is een van die oudste skole in die Duitse taalgebied. Danksy die beskikbaarheid van openbare vervoermiddels het die aantal koshuisleerders sedert die Tweede Wêreldoorlog bestendig afgeneem, en die meeste leerders woon tans tuis by hul gesinne. Die onderwysinstelling het sy vroeëre karakter as koshuisskool sodoende lankal kwytgeraak en is tans 'n gimnasium waar die klemtoon op onderwys in Oudgrieks en Frans gelê word, asook 'n sogenaamde Oberstufenrealgymnasium wat opleiding in drie kerngebiede aanbied - musiek, kunste en wiskunde met natuurwetenskappe.