Stompie Moeketsi

in Wikipedia, die vrye ensiklopedie
Jump to navigation Jump to search
Winnie Madikizela-Mandela is in 1990 aangekla vir aanranding, menseroof en moord op Stompie Moeketsi.

James Seipei (1974–1989), ook bekend as Stompie Moeketsi, was 'n tiener en ANC-aktivis vanaf Parys in Suid-Afrika. Hy is op 29 Desember 1988 saam met drie ander seuns deur lede van Winnie Madikizela-Mandela se lyfwagte, bekend ​​as die Mandela United Football Club, ontvoer. Moeketsi is op 1 Januarie 1989 vermoor, die enigste van die seuns wat doodgemaak is.[1]

Jerry Richardson, een van Mandela se lyfwagte het verklaar dat sy aan hom opdrag gegee het om die tieners uit Soweto te ontvoer en te vermoor. Stompie was die jongste van die vier. Hulle is ernstig mishandel en Stompie se lewelose liggaam is later gevind. Hy is blykbaar vir vermeende verraad doodgesteek.

Winnie Madikizela-Mandela is aangekla vir aanranding, menseroof, ontvoering en die beweerde moord op die 14-jarige aktivis. Sy word in 1991 vir die ontvoering en medepligtigheid tot aanranding skuldig bevind[2] en ses jaar gevangenisstraf opgelê. Haar vonnis is later versag na 'n boete en 'n twee-jaar opgeskorte vonnis.

Madikizela-Mandela is in 1997 voor die waarheid-en-versoeningskommissie gedaag. Hier het sy haarself verweer en gesê dat die aantygings dat sy by minstens 18 gevalle van menseregteskendings betrokke was, insluitende agt moorde, "belaglik" is. Sy beweer dat haar aanklaer, haar eertydse kameraad Katiza Cebekhulu, 'n voormalige "geestelike pasiënt" is en dat sy aantygings teen haar slegs "hallusinasies" is.[3]

Die waarheid-en-versoeningskommissie bevind dat die ontvoering wel op Madikizela-Mandela se instruksies uitgevoer is, en dat sy die aanrandings begin het en daaraan deelgeneem het. Met betrekking tot die moord op Stompie bevind die kommissie egter dat sy slegs "nalatig" was. [1]

Verwysings[wysig | wysig bron]