Suid-Afrikaanse Geografiese Nameraad
Die Suid-Afrikaanse Geografiese Nameraad (SAGNR) is die amptelike regeringsliggaam in Suid-Afrika wat die uitvoerende tak van die sentrale regering (deur die Minister van Kuns en Kultuur) adviseer op nuwe geografiese name sowel as die verandering van bestaande geografiese name.[1]
Doel van die Raad[wysig | wysig bron]
Die raad is gestig ingevolge die Suid-Afrikaanse Geografiese Nameraad, Wet 118 van 1998.[2] Die doel van die wet, volgens sy aanhef, is: "Om 'n permanente raadgewende liggaam bekend as die Suid-Afrikaanse Geografiese Nameraad te stig, wat die Minister van Kuns en Kultuur adviseer oor die verandering en standaardisering van geografiese name in Suid-Afrika vir amptelike doeleindes; om sy doelwitte, werksaamhede en werksmetodes te bepaal; en om voorsiening te maak vir aangeleenthede wat daarmee verband hou".
'n "Geografiese naam" word gedefinieer as die naam van enige landelike plek binne die gebiedsgrense van die Republiek van Suid-Afrika, insluitende enige regsgebied van die Republiek verkry deur 'n verdrag, hetsy:
- natuurlik of mensgemaak of aangepas deur die mens.
- bewoon of onbewoon.
Die Raad bepaal beide die naam van elke geografiese plek asook die geskrewe vorm van die naam.
Samestelling van die Raad[wysig | wysig bron]
Die Raad moet bestaan uit nie minder as 15 en nie meer as 25 lede wat deur die minister aangestel word, van wie:
- Een lid genomineer moet word deur elk van die nege Suid-Afrikaanse provinsies.
- Een lid genomineer moet word deur elk van die volgende:
- Die Suid-Afrikaanse Poskantoor.
- Die Hoofdirektoraat: Nasionale Ruimtelike Beplanning en Inligting.
- Die Pan-Suid-Afrikaanse Taalraad (PanSAT).
Die ander lede van die raad moet aangestel moet word volgens hul spesiale bevoegdheid, ervaring en belangstelling in die betrokke velde en met inagneming van die taalkundige, kulturele en demografiese kenmerke van die bevolking van Suid-Afrika.
'n Lid van die raad word aangestel vir 'n tydperk van drie jaar en kan dan heraangestel word vir 'n verdere tydperk van drie jaar.
Die raad kan so dikwels as wat nodig is vergader, maar ten minste drie keer per jaar.
Finale goedkeuring of afkeuring van ’n naam[wysig | wysig bron]
Die Minister van Kuns en Kultuur van Suid-Afrika het die finale mag om 'n geografiese naam, wat deur die raad aanbeveel is, goed te keur of af te keur. Enige goedkeuring of afkeuring moet aangekondig word in die Suid-Afrikaanse Staatskoerant voordat dit in werking tree. Enige persoon of liggaam wat ontevrede is met 'n geografiese naam wat deur die minister goedgekeur is, mag 'n appèl maak daarteen.
Sien ook[wysig | wysig bron]
Bronne[wysig | wysig bron]
- Die bogenoemde artikel bevat uittreksels uit die Suid-Afrikaanse Geografiese Nameraad Wet 118 van 1998, soos gewysig deur die Kulturele Wysigingswet Wet 36 van 2001.
- Merendeels vertaal uit Engels van Wikipedia
Verwysings[wysig | wysig bron]
- ↑ "Geographical Names" (PDF). Arts and Culture Guide 2010. Department of Arts and Culture, Government of South Africa. 2010. p. 89. Geargiveer (PDF) vanaf die oorspronklike op 20 Augustus 2015.
- ↑ United Nations Group of Experts on Geographical Names, Statistical Division, United Nations (2006). Manual for the National Standardization of Geographical Names. New York: United Nations. p. 110, note 9. ISBN 978-92-1-161490-9.
{{cite book}}: AS1-onderhoud: meer as een naam (link)
