Sydney Tower

in Wikipedia, die vrye ensiklopedie
Spring na: navigasie, soek
Nadere aansig van die bopunt van die toring
Die Sydney Tower

Sydney Tower (ook bekend as die AMP Tower, AMP Centrepoint Tower, Centre Point Tower) is Sydney se hoogste vrystaande struktuur en die tweede hoogste in Australië (met die Q1-gebou in Goudkus as die hoogste). Dit is ook die tweede hoogste uitkyktoring in die Suidelike Halfrond (na Auckland se Sky Tower). Die Sydney Tower se hoof uitkykplatform is egter 50 m hoër as Auckland se Sky Tower. Dit is na die Sydney-opera en die Sydneyhawebrug een van Sydney se bekendste bakens.

Die toring troon sowat 305 meter oor die Sydney se sentrale sakekern uit, en is geleë te 100 Market Street, tussen Pitt en Castlereagh-strate. Dit is ook toeganklik vanaf die Pitt Street Winkelsentrum. Die toring is oop vir die publiek en is een van die uitstaande toeriste trekpleisters in die stad en is geredelik sigbaar vanaf aanliggende woonbuurte.

Terwyl AMP Limited die Centrepoint winkelsentrum bestuur het, het die toring amptelik as die "AMP Tower" bekend gestaan. Nadat die Westfield-groep beheer oor die Centrepoint winkelsentrum oorgeneem het, is in Desember 2001 die naam na Sydney Tower verander.[1] Plaaslik verwys Jan-alleman gewoonlik na die toring as Centrepoint Tower.

Die winkelsentrum aan die voet van die toring word deur die Westfield-groep bestuur maar die toring self word deur Village Roadshow Theme Parks Group bestuur. Besoekers kan kaartjies by Village of by die hek koop wat hulle toegang tot al die besienswaardighede wat deur Village Roadshow bestuur word, naamlik Sydney Tower, Wildlife World en die Sydney Akwarium).

Geskiedenis[wysig | wysig bron]

Aanbou van die kantoorblok het in 1970 begin en die toring self in 1975. Openbare toegang tot die toring het 'n aanvang geneem in Augustus 1981.[2] Die koste van die toring het AU$36 miljoen beloop.[3]

Voor konstruksie van die toring was die hoogte van geboue in Sydney beperk tot 279 m om dit vir watervliegtuie veilig te maak om oor die stad te vlieg. In 1998 het die byvoeg van 'n weerligafleier aan die punt van die toring die hoogte van die toring op 309 m te staan gebring.

Verwysings[wysig | wysig bron]

  1. Westfield Group Limited. Westfield Centrepoint (van die Westfield-groep se webwerf. Nagegaan op 2 Maart 2008.
  2. Sydney Tower (van die Sydney Tower / Oztrek-webwerf. Nagegaan op 21 Junie 2008.
  3. Sydney Tower Fact Sheet”. (PDF) Internet Archive Wayback Machine: 29 Augustus 2007. URL besoek op 19 Mei 2009.

Eksterne skakels[wysig | wysig bron]

Koördinate: 33°52′13.64″S 151°12′32″O / 33.8704556°S 151.20889°O / -33.8704556; 151.20889