Temik

Temik, ook bekend as Two Step is 'n insekdoder. Dit is effektief teen blaaspootjies, plantluise en rooimyte, maar word hoofsaaklik gebruik om rondewurms dood te maak. Dit word ook gebruik om ongediertes te vergiftig.

Temik is een van die mees gebruikte plaagdoders internasionaal, en is ook een van die mees giftigste vir die omgewing. Temik-vergiftiging van afloop van landbouwater het gelei tot die vernietiging van gesonde ekosisteme en die onomkeerbare vergiftiging van vrugbare landbougrond. Vergiftiging deur hierdie plaagdoder kan ook gekoppel word aan die hoë kankersyfers in gemeenskappe rondom die Aralmeer.

Temik is doeltreffend waar weerstandbiedendheid teen organofosfaat insekdoders ontwikkel het, en is uiters belangrik in aartappelproduksie, waar dit gebruik word vir die beheer van rondewurms wat aangerig word deur grond en sommige blaarplae. Die hoë oplosbaarheid daarvan beperk die gebruik daarvan in sekere gebiede waar die watertafel naby die oppervlak lê.

Geskiedenis

Temik word vervaardig deur Bayer CropScience, maar is voorheen besit en vervaardig deur Union Carbide. Union Carbide se afdeling vir landbouchemikalieë is aan Rhône-Poulenc verkoop. Later is Aventis Cropscience gevorm uit Hoechst AG en Rhone-Poulenc Agrochemical, wat geduur het totdat Bayer dit in 2002 verkry het.

In Suid-Afrika (waar Temik bekend staan as Two Step) word dit algemeen deur inbrekers gebruik om honde te vergiftig.