Tempranillo

in Wikipedia, die vrye ensiklopedie
Die ligging van La Rioja, Spanje se hoofprodusent van die Tempranillo-kultivar
Tempranillo-wyn

Die Tempranillo is die belangrikste Spaanse kultivar (druifsoort) wat veral in die gebied La Rioja verbou word; ander belangrike gebiede is Penedés, Ribera del Duero en La Mancha. In Spanje word die kultivar op sowat 31 000 ha verbou. Die Tempranillo lewer duursame, donker soorte rooiwyn met 'n pikante smaak en talle ekstrakte op. Hulle bevat baie min suur, is eerder lig en bekend vir hulle vrugtige boeket. Fynproewers waardeer die ouer Tempranillo-wyne wat in eikevate bewaar word. Pure Tempranillo-wyne is skaars; meestal word die Tempranillo-kultivar met klein hoeveelhede Garnacha- en Carinena-kultivare gemeng. Die tipiese Tempranillo-wyn van La Rioja bevat sowat 60-80% Tempranillo-kultivare.

Die kultivar is minder bestand teen siektes, plae, hitte en droogte en eerder geskik vir die gematigde landbougebiede.

'n Tipiese kenmerk van die taamlik klein Tempranillo-druifsoort is sy dik skil. Die naam is afgelei van die Spaanse temprano ("vroeg"), aangesien die kultivar vroeër ryp word dan ander soorte. Ander name vir die Tempranillo is Aragonez, Tinto fino (in Ribera del Duero), Cencibel (in La Mancha en Valdepeñas), Ull de Llebre (in Katalonië), Tempranilla (in Argentinië) en Tinta Roriz (in Portugal).