Twaalf Apostels
Die Twaalf Apostels is deel van die Tafelbergreeks wat oor Kampsbaai uitkyk. Die reeks strek oor 6 km amper tot by Houtbaai.[1] Dit bestaan eintlik uit agttien[1] pieke en sluit in St. Peter's-piek, St. Paul's-piek, St. Luke's-piek en Judaspiek. Die gemiddelde hoogte bo seespieël van die Twaalf Apostels is 750 m, vergeleke met Tafelberg se 1 060 m.[1] In die tyd van die VOC het die piekereeks as die Kasteelbergen of Gewelbergen bekend gestaan.[1]
Die Twaalf Apostels is 'n gewilde bestemming vir stappers en bergklimmers.[1] Daar is altesame 26 staproetes op die gebergtes, waarvan tien gereeld gebruik word.[1] Die gewildste roete is Kasteelspoort.[1]
