UP Debatsvereniging
 | Hierdie artikel is 'n weesbladsy. Dit is nie geskakel of in ander bladsye ingesluit nie. Help Wikipedia deur na moontlike teks te soek en 'n skakel hierheen te plaas. |
| UP Debatsvereniging | |
| |
| Leuse | 'Ons, die mense van Suid-Afrika' |
|---|---|
| Gestig | 2015 |
| Tipe | Studente vereniging |
| Stad | Pretoria |
| Provinsie | Gauteng |
| Land | Suid-Afrika |
| Kleure | |
Die UP Debatsverengiging is 'n debatsvereniging verbonde aan die Universiteit van Pretoria (UP) in Pretoria, Suid-Afrika. Sy lede bestaan hoofsaaklik uit studente van die UP. Die Vereniging is gestig in 2015, maar die Universiteit self het 'n lang en roemryke geskiedenis van debattering en redevoering.
Die Universiteit van Pretoria is een van die voorste debat-universiteite wat onder andere jaarliks deelneem aan die ATKV-Universiteitedebat. Die Universiteit het al een derde van die landswye-finale gewen en spog met 4 podium plekke in die afgelope ses jaar van die kompetisie.[1] UP het ook in 2011 en 2013 met die louriere weggestap.
Juis om hierdie talent ten volle te ontgin, en 'n kultuur van intellektuele diskoers oor aktuele sake in Afrikaans te bevorder, is die UP Debatsvereniging daarop toegespits om verrykende en konstruktiewe debatgeleenthede vir studente te skep op 'n gereelde basis.
Struktuur en bestuur
[wysig | wysig bron]Die UP Debatsvereniging is 'n unieke Suid-Afrikaanse studentevereniging in die sin dat die lede van die uitvoerende komitee (of Kabinet) direk verkies word vanuit alle lede van die Vereniging se Huis. Dit het egter 'n sterk parlementêre inslag en benadering.
Die Vereniging word ook op die selfde wyse bestuur. Mosies van wantroue, begrotingstoesprake en huisstemmings is maar enkele wyses waarop die uitvoerende komitee verantwoordbaar gehou word.
Jaarliks moet daar 'n nuwe Kabinet verkies word vanuit alle stemgeregtigde lede van die UP Debatsvereniging. Stemgeregtigde lede word beperk tot geregistreerde lede van die Vereniging.
Kabinetslede word beperk tot vier een jaar termyne.
Die Kabinet bestaan egter uit die volgende posisies:
- Eerste Minister (Voorsitter);
- Adjunk Eerste Minister (Ondervoorsitter);
- Kanselier van die Tesourie (Tesourier);
- Staatssekretaris vir Tuissake (Hoof van Ontwikkeling);
- Staatssekretaris vir Buitelandse (Hoof van Bemarking);
- Kabinetsekretaris (Sekretaris);
- Speaker van die Huis (Hoof van Debatte).
Kenmerke
[wysig | wysig bron]Leuse
[wysig | wysig bron]Die leuse van die UP Debatsvereniging is 'Ons, die mense van Suid-Afrika' wat ook die eerste woorde van die aanhef van die Grondwet van Suid-Afrika is.[2] Die doel van die leuse soos gestel in die Vereniging se eie grondwet is om die belangrikheid van elke burger in die land se rol en verantwoordelikheid te beklemtoon. Die waardes van gelykheid, menswaardigheid en 'n grondwetlike demokrasie word verseker deur landsburgers wat aktief deelneem aan Suid-Afrika se aktuele gebeure en politiek.
Wapen
[wysig | wysig bron]Die wapen van die UP Debatsvereniging het op verskeie vlakke simboliek daaraan verbonde.
Die olyftakke van die wapen simboliseer vrede en oorwinning. Alhoewel die simboliek van olyftakke sterk in baie Westerse kulture is, word dit ook gevind in talle ander antieke kulture.[3] In konteks van die UP Debatsvereniging behels die olyftakke die vreedsame oorwinning wat in ons land behaal is met ons grondwetlike demokrasie en hoe ons as landburgers elkeen die verantwoordelikheid het om hierdie oorwinning vreedsaam te beskerm deur dialoog te skep en te debatteer.
Die pilare van die wapen simboliseer geregtigheid, stabiliteit en onverganklikheid. Hierdie waardes word in 'n demokrasie verseker deur 'n aktiewe en betrokke bevolking waar debattering en die verwisseling van idees en standpunte sentraal staan.
Daar is hoofsaaklik drie kleure van die UP Debatsvereniging wat ook te vind is in hul wapen. Eerstens verteenwoordig die kleur geel die speaker van die Huis wat gesimboliseer word deur struktuur. Tweedens verteenwoordig blou die regering se kant van debatte in die Huis en rooi verteenwoordig die opposisie.
Debattering
[wysig | wysig bron]Debatte van die UP Debatsvereniging vind hoofsaaklik plaas op twee wyses – kompetisie- en huisdebatte.
Kompetisiedebatte vind plaas deur lede van die UP Debatsvereniging wat die Vereniging en die Universiteit van Pretoria verteenwoordig by 'n verskeidenheid van kompetisies onder andere die ATKV Universiteite-debat Kompetisie en ander plaaslike kompetisies.
Huisdebatte vind maandeliks plaas tussen alle teenwoordige lede van die Vereniging wat 'n gegewe mosie in die Huis debatteer. Toesprake word vir bepaalde en beperkte tye gelewer en punte van inligting is oop vir enige persoon teenwoordig in die Huis. Hierdie styl beoog om 'n inklusiewe en oop platvorm te skep vir debatte om plaas te vind. Tydens huisdebatte word eksterne en bekende sprekers ook genooi om deel te neem aan die debatte.
Taalbeleid
[wysig | wysig bron]Die UP Debatsvereniging is daarop gemik om redevoering en debattering in Afrikaans te bevorder maar neem egter deel aan die breër debatsgemeenskap nie net op die Universiteit van Pretoria se kampusse nie maar ook die land. Lede van die UP Debatsvereniging neem gereeld deel aan talle ander debatskompetisies.
Die UP Debatsvereniging se stigters lede was egter ook die stigters van die eerste Universiteit van Pretoria kampuswye debatskompetisie 'UP Student House Debate' waaraan talle studentverenigings, politieke jeugpartye, koshuise en fakulteitshuise jaarliks deelneem.
Status en lidmaatskap
[wysig | wysig bron]Lidmaatskap is beskikbaar vir enige student aan die Universiteit van Pretoria en ere-lidmaatskap word toegeken aan nie-studente lede. Alle debatte van die UP Debatsvereniging is oop vir die publiek om te kom luister en aan deel te neem.
Die Vereniging is tans amptelik gestig as 'n Universiteit van Pretoria studentevereniging met meer as 180 geregistreerde lede.
Geskiedenis van debat by die Universiteit van Pretoria
[wysig | wysig bron]Die heel eerste vereniging by die Universiteit van Pretoria, was die tweetalige Engels-Nederlandse Letterkundige Debatsvereniging. Die lede van hierdie vereniging het bymekaar gekom op Vrydae omdat dit onmoontlik was ’to compete with the bioscopes on Saturday evenings’ [4]
Bronnelys
[wysig | wysig bron]- ↑ "Kwinkslae, spitsvondighede tydens debatskompetisie". Besoek op 30 Maart 2016.
- ↑ "Grondwet van Suid-Afrika" (PDF). Geargiveer vanaf die oorspronklike (PDF) op 26 Augustus 2018. Besoek op 30 Maart 2016.
- ↑ Lucia Impelluso (2004). Nature and its symbols. Getty Publications. p. 43.
- ↑ "Tukkie Vol. 15 Nr. 2" (PDF). Geargiveer vanaf die oorspronklike (PDF) op 31 Maart 2016. Besoek op 30 Maart 2016.