Ulf Timmermann
Ulf Timmermann, gebore 1 November 1962 in Oos-Berlyn, is 'n voormalige Duitse gewigstoter wat die wêreldrekord verskeie kere gedurende die 1980's verbeter het, en is die eerste en een van slegs vier mense wat ooit oor 23 meter gestoot het (saam met Randy Barnes, Joe Kovacs en Ryan Crouser).
Timmermann is in Berlyn gebore uit 'n atletiekgesin en het op 13 jarige ouderdom met gewigstoot begin. Hy het sy eerste wêreldrekord verbeter in 1985 met 'n stoot van 22.62 meter. Op 22 Mei 1988 het hy die eerste persoon geword om oor 23 meter te stoot met 'n afstand van 23.06 meter in Chania, Griekeland.
Hy het goud vir Oos-Duitsland by die 1988 Olimpiese Spele in Seoel gewen, voor Randy Barnes van die VSA. Die atlete het so goed gedoen in dié kompetisie dat die vierde beste afstand elke vorige Olimpiese Spele in gewigstoot sou wen. By die Olimpiese Spele van 1992 het Timmerman Duitsland verteenwoordig, maar 'n teleurstellende vyfde geëindig. Hy het kompetisie daarna verlaat.[1][2]
Timmermann is die verste gewigstoter van alle tye in die gewigstoot deur van die gly-tegniek gebruik te maak. Hy het ook 'n afstand 22 meter en verder in 16 verskillende kompetisies behaal. Sy afrigter was Werner Goldmann wat gewigstoot en diskusgooi in Berlyn afgerig het.
Verwysings[wysig | wysig bron]
- ↑ Brigitte Berendonk: Doping-Dokumente - Von der Forschung zum Betrug. Springer-Verlag, Berlin 1991, ISBN 3-540-53742-2, S. 128, Tabelle 8
- ↑ Schweizer Geheimbund, Der Spiegel, 27. Juli 1992
