United States Postal Service

in Wikipedia, die vrye ensiklopedie




Regsvorm

Onafhanklike regeringsagentskap


Stigting

1775, herorganisasie in 1971


Hoofkwartier



475 L'Enfant Plaza SW
Washington, DC 20260-2202
VSA


Bestuurder

Louis DeJoy (Posmeester-generaal)


Personeel

689 922 (2018)[1] van wie

  • 389 990 manlik en
  • 299 932 vroulik

Webtuiste
www.usps.com

Die United States Postal Service ("Posdiens van die Verenigde State", oorspronklik voor 1971, toe dit in sy geheel deur die federale Amerikaanse regering bestuur is, bekend as die U.S. Post Office Department), dikwels kort Post Office, U.S. Mail of Postal Service genoem, afgekort USPS, is 'n onafhanklike agentskap van die Amerikaanse federale regering wat posdienste in die Verenigde State verskaf. Dit is een van min regeringsagentskappe wat uitdruklik deur die Amerikaanse grondwet gemagtig is en die enigste posafleweringsdiens in die VSA wat pos by elke Amerikaanse adres kan aflewer. Die USPS ontvang geen belastinggeld of ander subsidies nie. Sy bedryfsinkomste bestaan uit posgeld en die verkoop van produkte en dienste. In 2009 is sy inkomste op $75 miljard beraam en is byna die helfte van alle posstukke op aarde deur die USPS afgelewer.[2]

Die Amerikaanse Posdiens se wortels strek terug tot 1775 toe Benjamin Franklin deur die Tweede Kontinentale Kongres as posmeester-generaal benoem is. In 1792 is die Poskantoor-departement op regeringsvlak gevestig, waarby posmeesters-generaal lede van die Amerikaanse Presidente se kabinet was. Die Posdiens in sy huidige vorm as onafhanklike regeringsagentskap is in 1971 deur die Postal Reorganization Act, die Wet oor die Herorganisasie van die Amerikaanse Posdiens, geskep.

Vir die bemanningslede van die Apollo 12-maansending van 1969 was daar geen konvensionele lewensversekering nie. Hulle het in plaas daarvan 'n beperkte aantal (enkele honderd) spesiale koeverte geteken wat - sou die sending misluk het - deur hul naasbestaandes verkoop kon word

Volgens die American Community Survey van 2018 het die Amerikaanse Posdiens 689 922 werknemers in diens gehad. Statistieke van 2014 toon dat die Posdiens oor 'n vloot van 211 264 voertuie beskik het. Sodoende het die USPS die grootste vloot van burgerlike voertuie ter wêreld bedryf. Die Amerikaanse Posdiens is wettelik verplig om sy posdienste aan alle Amerikaners beskik te stel, ongeag van hul woonplek, teen dieselfde tariewe en volgens dieselfde gehalte. Posdiens-medewerkers moet daarnaas 'n eed van getrouheid aan die Amerikaanse Grondwet aflê.

Die USPS het eksklusiewe toegang tot posbusse met die opskrif U.S. Mail asook privaatposbusse in die VSA, maar ding ten opsigte van pakketdienste met privaatondernemings soos United Parcel Service (UPS) mee. 'n Ooreenkoms oor beperkte samewerking is in 2001 met FedEx Express gesluit. Die sogenaamde Air Cargo Network (ACN)-kontrak met FedEx, wat tot 29 September 2024 verleng is, maak voorsiening vir die verskaffing van nasionale lugposvervoerdienste vir USPS deur FedEx. FedEx is tans die grootste verskaffer van lugpos-vervoerkapasiteite vir die Amerikaanse posdiens.[3]

Behalwe vir koste wat deur besondere dienste vir gestremdes en oorsese kiesers veroorsaak word, word die Amerikaanse Posdiens sedert die vroeë 1980's nie meer deur belastinggeld gesubsidieer nie. In 2006 het die posvolume sy hoogste vlak ooit bereik, maar daarna het die USPS as gevolg van 'n resessie waarin die Amerikaanse ekonomie verkeer het, 'n sterk daling in dié volume en sodoende ook sy bedryfsinkomste ondervind.

Die Amerikaanse Posdiens se finansiële posisie is verder bemoeilik deur nuwe wetgewing. Die Postal Accountability and Enhancement Act, wat deur die Amerikaanse Kongres afgekondig is, verplig die USPS om jaarliks VS$ 5,5 miljard in 'n rekening in te betaal waaruit mediese skema's vir afgetrede posdienswerknemers vooraf gefinansier moet word. Dié reëling oortref soortgelyke voorskrifte vir ander regerings- en privaatinstellings.

Die Amerikaanse Posdiens is gevolglik genoodsaak om sy uitgawes te besnoei en nuwe bronne van inkomste te vind. In die fiskale jaar 2014 het die USPS verliese van VS$ 5,5 miljard aangeteken, terwyl sy bedryfsinkomste VS$ 67,8 miljard beloop het.[4]

Die Amerikaanse Posdiens het as gevolg van die koronaviruspandemie van 2019-2020 groot verliese gely, veral omdat die volume besigheidspos sterk afgeneem het.[5]

Posmeester-generaal[wysig | wysig bron]

Die Amerikaanse Posmeester-generaal is die tweede hoogs betaalde regeringsamptenaar na die President met 'n jaarlikse salaris van VS$ 276 840.[6] Sedert 1 Februarie 2015 het Megan J. Brennan die amp van 74ste Posmeester-generaal beklee as die eerste vrou in die geskiedenis van die Amerikaanse Posdiens wat vir dié posisie benoem is. In Mei 2020 is Louis DeJoy as haar opvolger en 75ste posmeester-generaal benoem.

Military Postal Service Agency[wysig | wysig bron]

Die USPS tree op as moederagentskap vir die Military Postal Service Agency, 'n militêre posagentskap met sy hoofkantoor in Arlington, Virginië. Dit verskaf wêreldwyd posdienste aan personeellede van die Amerikaanse Departement van Verdediging en hul familielede.[7]

Verwysings[wysig | wysig bron]

  1. United States Census Bureau: Population. Besoek op 25 Junie 2020
  2. FedEx Newsroom, 19 Augustus 2009: USPS and FedEx Renew Global Express Guaranteed Agreement. Besoek op 25 Junie 2020
  3. United States Postal Service - About: Postal Service & FedEx renew contract. Besoek op 25 Junie 2020
  4. "USPS – Annual Report Comprehensive Statement 2014" (PDF). Geargiveer vanaf die oorspronklike (PDF) op 1 Julie 2015. Besoek op 7 Junie 2015.
  5. Politico Opinion, 16 April 2020: The Postal Service Is in Deep Trouble. Here’s One Way to Get It Out. Besoek op 25 Junie 2020
  6. www.washingtonpost.com, 10 Mei 2011: Salaries of top Postal Service executives revealed. Besoek op 7 Junie 2015
  7. "USA.gov: Military Postal Service Agency". Besoek op 11 Desember 2020.

Eksterne skakels[wysig | wysig bron]

Inspekteur-generaal

Geskiedenis

National Postal Museum

Vakbonde