Vakuumtrein

in Wikipedia, die vrye ensiklopedie
'n Moontlike vakuumtreintonnel

Die Vakuumtrein is 'n konsep wat reeds oor 'n honderd jaar gelede voorgestel is (maar nog nie gebou is nie) en tans ontwerp word vir toekomstige hoë-spoed spoorwegvervoer. Hierdie konsep behels beweging deur magnetiese levitasie binne-in lugontruimde (vakuum) of gedeeltelik-lugontruimde buise of tonnels. Die gebrek aan lugweerstand sal vakuumtreine in staat stel om minimale krag te gebruik om teen baie hoë spoed te beweeg, tot 6 400-8 000 km/h (4 000-5 000 mph of 2 km/s), of 5-6 keer die spoed van klank (Mach 1) by standaardtoestande, en eweneens baie goedkoop.[1] Alhoewel die tegnologie tans ondersoek word vir die ontwikkeling van plaaslike netwerke, is voorstanders van mening dat die mees suksesvolle vakuumtreine vir transkontinentale roetes op 'n globale netwerk gebruik sal word.

Lang vakuumtreintonnels kan baie vinnige interkontinentale reise moontlik maak. Vakuumtreine kan swaartekrag gebruik om hulle met hul versnelling te help. Indien die treine so vinnig sou beweeg as wat voorspel word, sal die reis tussen Beijing en New York minder as 2 uur duur, en vliegtuie verdring as die wêreld se vinnigste modus van openbare vervoer.

Reis deur lugontruimde buise kan supersoniese spoed bereik sonder die nadelige effekte van 'n soniese knal wat ondervind word met supersoniese vliegtuie. Die treine sal waarskynlik geruisloos en vinniger as Mach 1 kan funksioneer. Dit kan ook gekombineer word met swaartekrag treine.

Maar sonder groot vooruitgang met tonnelgrawing en verbeterde tegnologie in tonnelkonstruksie, sal vakuumtreine steeds te duur wees. Om koste te bespaar, is alternatiewe soos geligte betonpype met gedeeltelike lugleemtes reeds voorgestel.

Navorsers by Suidwes Jiaotong Universiteit in China is sedert 2010 besig met die ontwikkeling 'n vakuumtrein wat 'n spoed van 1 000 km/h sal bereik. Hulle sê die tegnologie kan binne die volgende 10 jaar in werking gestel word.[2][3][4]

Verwysings[wysig | wysig bron]

  1. "Transatlantic Tunnel". Joseph Giotta (verteller), Powderhouse Productions. Extreme Engineering ("Discovery Channel"). 2003-04-16. http://dsc.discovery.com/convergence/engineering/transatlantictunnel/interactive/interactive.html. 
  2. "Vactrain development underway in China" (in Engels). China.org.cn. 2 Augustus 2010. Geargiveer vanaf die oorspronklike op 21 Augustus 2017. Besoek op 26 September 2011.
  3. "Laboratory working on train to run at 1,000kph" (in Engels). Eastday.com. 3 Augustus 2010. Geargiveer vanaf die oorspronklike op 18 Januarie 2015. Besoek op 26 September 2011.
  4. "China developing 600 mph airless maglev high-speed train" (in Engels). SmartPlanet. 9 Augustus 2010. Geargiveer vanaf die oorspronklike op 4 November 2013. Besoek op 26 September 2011.
Hierdie artikel is in sy geheel of gedeeltelik vanuit die Engelse Wikipedia vertaal.