Vancouver

in Wikipedia, die vrye ensiklopedie

Vancouver

Kaart Wapen
Vlag
 Land Vlag van Kanada Kanada
 Provinsie Brits-Columbië
 Koördinate 49°16′N 123°08′W / 49.267°N 123.133°W / 49.267; -123.133
 Stigting 1866 (Gastown)
 Inkorporasie 1886
 Oppervlakte:  
 - Totaal 114,67 vk km
 Hoogte bo seevlak 2 m
 Bevolking:  
 - Totaal (2011) 603 502
 - Bevolkingsdigtheid 5 252/vk km
 - Metropolitaanse gebied 2,3 miljoen
 Tydsone UTC -8
(Pasifiese Standaardtyd)
 Burgemeester Gregor Robertson
(Vision Vancouver)
 Amptelike webwerf City of Vancouver

Vancouver [vænˈkuːvɚ] is 'n hawestad aan die Stille Oseaan, in die weste van die provinsie Brits-Columbië, Kanada, met 'n bevolking van 603 502 in 2011.

Vancouver, soos gesien vanuit Grouse Mountain

Vancouver is die naamgewende metropool van die Groter Vancouver Streeksdistrik met 2,3 miljoen inwoners en die grootste stedelike nedersetting in westelike Kanada. Die stad is vernoem na die Britse kaptein George Vancouver wat in 1792 as opmeter in die gebied werksaam was.

Vancouver is ook die naam van die groot eiland langs die kus, alhoewel dit nie deel van die stadsgebied is nie. Vancouver-eiland is met sy Fort Victoria die voormalige hoofkwartier van die Hudsonbaai-kompanjie (Hudson's Bay Company) in Wes-Kanada, wat later tot die administratiewe hoofstad van British Columbia, Victoria, ontwikkel.

Vancouver lê op 'n skiereiland tussen die Fraserrivier en die inham Burrard Inlet, met pragtige groen berge, wat tot in die somer sneeubedek bly, in die agtergrond.

Vancouver is vandag 'n kosmopolitiese stad, wat bekend staan vir sy aangename weskus-leefstyl en die vreedsame naasbestaan van 'n verskeidenheid kulture. Die stad met sy gematigde klimaat word dikwels met San Francisco vergelyk en kan danksy sy ligging en sy talle parke in baie opsigte met die Kaliforniese metropool meeding, alhoewel die naglewe van Vancouver nog nie regtig ontwikkel het nie.

Die gematigde klimaat en aantreklike omgewing maak van Vancouver 'n gewilde woonplek in Wes-Kanada, en die stad het veral sedert die tagtigerjare van die 20ste eeu ongekende ekonomiese groei beleef. 'n Groot aantal nuwe immigrante het hulle in die stad gevestig, waaronder ook tienduisende voormalige burgers van Hongkong.

Vancouver het as die gasheerstad van die Olimpiese Winterspele in Februarie 2010 opgetree. Sommige van die wedstryde het plaasgevind in Whistler, 'n dorp wat sowat 125 kilometer noordoos van Vancouver geleë is. Vancouver was die derde Kanadese gasheerstad vir Olimpiese SpeleMontreal in 1976 en Calgary in 1988.

Geskiedenis[wysig | wysig bron]

Vancouver West End, English Bay
Die misomhulde Lions Gate-brug teen sononder in Oktober 2013
Al is dit een van die mees digbevolkte metropole in Noord-Amerika, is Vancouver nogtans 'n stad wat 'n hoë lewensgehalte vir sy bewoners bied

Die sentrum van Brits-Columbië se goudkoors in 1858 is New Westminster, 'n voorstad van Vancouver, wat toe nog 'n groot bosgebied is.

In vergelyking met die Oos-Kanadese metropole is Vancouver 'n taamlike jong stad. Sy bakermat is die stadswyk Gastown, waar Jack Deighton en sy eggenote in 1866 met 'n whiskeyvat voet aan wal gesit en digby 'n saagmeule hul kroeg geopen het. Deighton, 'n egte praatgraag, kry vinnig die bynaam Gassy Jack, en die nedersetting staan voortaan bekend as Gassy's Town (later Gastown).

Toe die spoorwegmaatskappy Canadian Pacific Railroad in 1886 besluit om 'n spoorwegverbinding dwarsoor die vasteland tot by Vancouver se Burrard Inlet aan te lê, begin die ekonomiese groei van die stad, wat ter ere van kaptein George Vancouver sy huidige naam kry. 1886 is ook die amptelike stigtingsdatum van Vancouver.

Vancouver se hawe word 'n belangrike voorpos in die handel met die Verenigde State, China en Japan; veral koring en steenkool word hier vanaf uitgevoer. In hierdie tydperk verdubbel die inwonertal elke vyf jaar, en in 1912 het die inwonertal reeds 120 000 beloop. In 1930 was Vancouver die derde grootste stad in Kanada, na Montréal en Toronto.

In 1898 het duisende gouddelwers in Vancouver-hawe aangekom wat tydens die stormloop na die nuwe goudvelde van die noorde ook hulle toerusting en voedselvoorrade hier gekoop het.

Met die opening van die Panamakanaal in 1914 kry Vancouver 'n maklike toegang tot die Europese markte. Dit is tans verreweg die grootste uitvoerhawe vir graan in Noord-Amerika.

Die wêreldtentoonstelling Expo 1986 bring 'n groot ekonomiese oplewing vir die stad en staan aan die beginpunt van 'n massa-immigrasie uit onder meer Hongkong. Sowat 70 000 welgestelde burgers van hierdie Chinese hawestad vestig hulle in Vancouver.

Vandag is die stad Kanada se poort na die markte van die Stille Oseaan, en 'n groot aantal immigrante uit die Verre Ooste kom hulle nog steeds hier vestig.

Ekonomie[wysig | wysig bron]

Alhoewel bosbou steeds die belangrikste ekonomiese sektor is, het Vancouver as 'n moderne metropool, wat deur gebiede van groot natuurskoon omring word, tot 'n belangrike toeristebestemming in Kanada se weste ontwikkel. Toerisme is dan ook die tweede belangrikste bron van inkomste.

Groot rolprentateljees in Vancouver en Burnaby maak van Groter Vancouver en omliggende gebiede een van die spilpunte van die rolprent- en televisiebedryf in Noord-Amerika, wat aan die stad byname soos Hollywood North en Brollywood besorg het. Gewilde televisiereekse soos Supernatural word plaaslik vervaardig.[1]

Verwysings[wysig | wysig bron]

Eksterne skakels[wysig | wysig bron]

  • (en) Toerisme-inligting oor Vancouver op Wikivoyage
  • (en) Amptelike webwerf
  • (en) "Vancouver". Encyclopædia Britannica. Besoek op 26 Junie 2023.