Vlug in die Namib

Vlug in die Namib
Skrywer	Henno Martin
Land	Suid-Afrika
Taal	Afrikaans
Uitgewer	Tafelberg Uitgewers Ltd.
Uitgegee	1959
Voorloper	Wenn es Krieg gibt, gehen wir in die Wüste
Letterkunde-portaal

Vlug in die Namib is ’n ware avontuurverhaal deur Henno Martin. Dit speel af tydens die Tweede Wêreldoorlog in die destydse Suidwes-Afrika (nou Namibië) toe die Suid-Afrikaanse regering besluit het om alle Duitse onderdane te interneer. Twee jong Duitsers met doktorsgrade in die geologie, Henno Martin en Hermann Korn, wat beide maar kort tevore in die land aangekom het, was vasbeslote dat dit nie hul lot gaan wees nie. Hulle besluit om vir die duur van die oorlog die Namibwoestyn hul tuiste te maak. Met ’n vragmotor gelaai met alles wat hulle as noodsaaklik geag het, het hulle saam met hul hond Otto in die vallei van die Kuisebrivier gaan wegkruip. Die boek handel nie alleen oor die fisiese gevare van die lewe in die woestyn nie, maar ook oor die geestespanninge wat eensaamheid en afgesonderdheid oplewer. Martin skets die lewe in die Namib deur die oë van ’n vlugteling, wetenskaplike, filosoof en natuurliefhebber.

Die boek is aanvanklik in 1956 in Duitsland uitgegee onder die titel Wenn es Krieg gibt, gehen wir in die Wüste. In 1959 het die eerste Afrikaanse uitgawe verskyn en het daarna verskeie herdrukke beleef. Die boek is jare lank as leesboek deur Afrikaanstalige junior hoërskoolleerlinge gebruik. In 2002 is die boek in Engels vertaal met die titel The Sheltering Desert.

Henno Martin (Freiburg, 15.3.1910 - Göttingen, 7.1.1998) was professor in Kaapstad en Sao Paulo en later professor in die geologie en paleontologie aan die Universiteit van Göttingen.

Bibliografie

• Allgemeine Zeitung (Windhoek), 13 Maart 1998
• Martin, Henno: Vlug in die Namib. ’n Robinsonade in die woestyn. Uit die Duits vertaal en verkort deur S. Vivier. Kaapstad: Tafelberg, 1959.
• Martin, Henno: Wenn es Krieg gibt, gehen wir in die Wüste. Eine Robinsonade in der Namib. Stuttgart: Union Verlag, 1956