Die Voortrekkers (organisasie)

in Wikipedia, die vrye ensiklopedie
(Aangestuur vanaf Voortrekkerbeweging)
Die Voortrekkerwapen.

Die Voortrekkers is ’n Afrikaanse jeugorganisasie wat op 30 September 1931 gestig is. Die Voortrekkers is ʼn beweging wat toegespits is op die toerusting van sy lede vir leierskap en diensbaarheid, en die vorming van jongmense se karakter.[1][2]

Begronding[wysig | wysig bron]

Die Voortrekkers se grondslag is: "God Drie-enig se openbaring aan ons deur die Bybel en die skepping."

Wese[wysig | wysig bron]

Die Voortrekkers is 'n kultuurbeweging wat hul lede, in besonder die jeug, toerus om as moderne Afrikaners, positiewe Burgers en konsekwente Christene hulle roeping deur diensbaarheid uit te leef.[1]

Getrou aan die oorspronklike stigtingsideale van NJ van der Merwe, Vader Visser en Japie Heese is Die Voortrekkers vandag steeds ’n toekomsgerigte jeugorganisasie wat:

  • Afrikanerkinders se karakter deur Bybels-Christelike waardes vorm.
  • Afrikanerkinders die geleentheid bied om hul kultuur in die natuur deur avontuur te geniet.
  • Afrikaners begelei om as oortuigde Christene nie net Bybelse waardes in hul persoonlike lewens uit te leef nie, maar ook om gemeenskapswaardes deur middel van diens, deelname en standpunte te help vorm.
  • Afrikanerkinders help om lewensvaardighede te ontwikkel om as uitnemende en diensbare leiers ’n betekenisvolle en positiewe bydrae te lewer tot die land en die kontinent.
  • Afrikanerkinders ’n tuiste bied waarin hulle Afrikaners se geskiedenis, taal, kultuur en tradisies ten volle kan uitleef en geniet.

Hierdie ideale het oor dekades neerslag gevind in die wese, waardes en strategiese doelwitte van Die Voortrekkers om jong Afrikaners as uitnemende leiers te ontwikkel.

Doelstellings[wysig | wysig bron]

Doelstellings vloei voort uit die wese en is die Voortrekkers se verbintenis tot 'n bepaalde aksie.

Die Voortrekkers is daartoe verbind om:

  1. hul geloof in God Drie-enig God in al hul Voortrekkeraktiwiteite te bevestig.
  2. as moderne Afrikaners hul taal, kultuur en erfenis met trots te bevorder.
  3. as positiewe burgers opbouend betrokke te wees by hul gemeenskap, land en kontinent.
  4. as konsekwente Christene deur hul woorde en dade te getuig.
  5. diensbaar in hul omgewing te wees.

Voortrekkerkode[wysig | wysig bron]

Elke lid van Die Voortrekkers strewe daarna om die Voortrekkerkode na te leef, wat soos volg lui:

  1. 'n Voortrekker glo in die Drie-enige God en dien Hom.
  2. 'n Voortrekker se woord is sy eer.
  3. 'n Voortrekker is gehoorsaam.
  4. 'n Voortrekker leef met respek.
  5. 'n Voortrekker is trots op hul taal, kultuur en erfenis en bevorder dit.
  6. 'n Voortrekker leer uit die geskiedenis en bou daarop voort.
  7. 'n Voortrekker waardeer en bewaar sy omgewing.
  8. 'n Voortrekker neem leiding.
  9. 'n Voortrekker is oplettend en weerbaar.
  10. 'n Voortrekker is diensbaar.

Voortrekkersimbole[wysig | wysig bron]

Die drie kernsimbole van Die Voortrekkers is die Voortrekkerwapen, die vlag en die Hou Koers-lied.

Die Voortrekkerwapen[wysig | wysig bron]

Die ontwerp van die wapen was die idee van prof. B Taute, latere provinsieleier van Kaapland, terwyl die leuse die voorstel van die eerste hoofleier dr. NJ van der Merwe was. Die Voortrekkerwapen skep die indruk van beweging, doelgerigte beweging op ʼn voorafbepaalde koers, die pad van Suid-Afrika.

Die leuse[wysig | wysig bron]

Die leuse Hou Koers herinner die lede om koersvas vorentoe te gaan – getrou aan wie Die Voortrekkers is.

Geskiedenis[wysig | wysig bron]

Die behoefte aan 'n Afrikaanse jeugbeweging is in 1913 deur dr. C.F. Visser ("Vader van die Voortrekkers") besef[3]. Hy het met die Boy-Scouts se stigter, Robert Baden-Powell, kontak gemaak om die stigting van 'n Afrikaanse Boy-Scout beweging tot stand te bring, maar hulle kon op die ou end nie tot 'n vergelyk kom oor enkele grondslag-kwessies nie. Deur dr. Visser se aansporing is 'n tak in 1920 aan die Voorbereidende Tegniese Skool (teenswoordig die Hoërskool Sentraal) in Bloemfontein gestig. Ander takke het gevolg, onder meer in Graaff-Reinet en Nieuwoudtville, maar in die eerste bestaansjare was daar nog geen eenvormige grondslag waarvolgens die beweging beheer is nie.

Die amptelike stigting het eers op 30 September 1931 in Bloemfontein plaasgevind, en die eerste lede is by die geleentheid deur die destydse Eerste Minister, genl. J.B.M. Hertzog, ingelyf. Die Voortrekkerleuse is "Hou koers", en die wapen beeld 'n brandende fakkel op 'n wawiel uit. Daar is ook 'n Voortrekker-kode met 10 artikels wat die lede onder meer aanspoor om die gebruik van Afrikaans te bevorder. Van die vernaamste bedrywighede van die Voortrekkerbeweging is die gereelde kampe wat gehou word om die kinders die geleentheid te bied om met die natuur kennis te maak.

Voortrekkers by Karel Landman Monument
Voortrekker kinders neem deel aan 'n gedenkdiens by die Karel Landman Monument naby Alexandria. Kinders dra die nuwe (huidige) uniform.

Voortrekker-aktiwiteite is georganiseer volgens 'n kommandostelsel, wat weer uit veldkornetskappe en spanne opgebou is. Buiten die Algemene Kongres, wat minstens elke 4 jaar gehou word, is daar 'n uitvoerende bestuur met hoof- en dagbesture in die onderskeie provinsies.

1913-1940[wysig | wysig bron]

1940 - 1966[wysig | wysig bron]

1966-1981[wysig | wysig bron]

1981-1997[wysig | wysig bron]

1997-2001[wysig | wysig bron]

In 1997 is prof Tom Dreyer as hoofleier verkies. Tydens sy termyn is die formele uniform met 'n meer moderne en goedkoper Voortrekkerdrag vervang. Dit behels 'n donkerblou of rooi gholfhemp, blou denimbroek en moulose donkerblou baadjie.[4]

2001-2013[wysig | wysig bron]

2013-2017[wysig | wysig bron]

2017-2023[wysig | wysig bron]

2023-hede[wysig | wysig bron]

Dr. Karin Stoffberg is op 14 Julie 2023 verkies as die eerste vroulike hoofleier in die organisasie se bestaan.[5] Sy volg vir dr. Danie Langner op wat hoofleier vanaf 2013 - 2023 was.[6]

Bronnelys[wysig | wysig bron]

Verwysings[wysig | wysig bron]

  1. 1,0 1,1 Voortrekker web blad https://voortrekkers.co.za/wie-is-ons, 14/07/2023
  2. Die Voortrekker-beweging leer kinders speel-speel waardevolle vaardighede. Netwerk24, 08 Apr. 2015
  3. FAK Geskiedenis, Die Vastrappers (1931-1966) – Afrikanergeskiedenis Geargiveer 14 Julie 2023 op Wayback Machine, 14/07/2023
  4. Verkennerlewe-2018.pdf (voortrekkers.co.za)
  5. www.rsg.co.za/rsg/nuus/ Geargiveer 27 September 2022 op Wayback Machine RSG nuusberig uitgesaai om 13:00 op 14/07/2023.
  6. Voortrekker se Web blad: dagbestuur, 13 Julie 2023.

Eksterne skakels[wysig | wysig bron]