Waikiki

in Wikipedia, die vrye ensiklopedie
Spring na: navigasie, soek
'n Skemer-uitsig oor Waikiki-strand

Waikiki [ʋaikiːkiː] is 'n stadswyk van Honolulu (Hawaii, Verenigde State) aan die suidkus van die eiland Oahu met 'n oppervlak van twee vierkante kilometer en 19 720 inwoners (2000).

Waikiki lê in die suidooste van Honolulu en strek van die Ala Wai-kanaal (wat gegrawe is om die vroeëre moerasgebiede droog te lê) in die weste en noorde tot by die bergspits Diamond Head in die ooste. Die naam beteken in Hawaiiaans letterlik "Spuitende Water" en verwys na die bronne en stroompies, wat vroeër in die moerasgebiede uitgemond en Waikiki van die binneland geskei het.

Waikiki, die bekendste toeristeoord van Hawaii, het al eeue lank as 'n ontspanningsplek gedien en is veral deur die Hawaiiaanse koninklike gesin as 'n rusplek gebruik. Vandag word die buurt met sy talle wolkekrabber-hotelle (waaronder die Hilton Hawaiian Village, die Halekulani, die Hyatt Regency Waikiki en die Sheraton Waikiki, asook historiese hotelle uit die vroeë 20ste eeu soos die Moana Surfrider Hotel en die Royal Hawaiian Hotel) as die sentrum van Hawaii se toerismebedryf beskou. Die buurt beskik naas sy luukse hotelle ook oor 'n dieretuin, 'n akwarium en talle winkels.

Waikiki-strand is een van die mees bekendes ter wêreld en spog sedert 2001 met gratis rolprent-vertonings op 'n 30-voet-skerm ("Sunset on the Beach").

Geskiedenis[wysig]

Die Moana-hotel
The Royal Hawaiian Hotel

Waikiki was oorspronklik net 'n smal strepie land, wat deur moerasgebiede, visdamme en rys- en tarovelde gekenmerk was. Met die bou van die Ala Wai-kanaal is die moerasgebiede in 1922 drooggelê, en die gebied het vinnig tot Hawaii se belangrikste toeristeoord ontwikkel.

Klein herberge het reeds teen die einde van die 19de eeu ontstaan, en in 1901 is die eerste groot hotel, die Moana, geopen. Die historiese houtgebou vestig tans die Sheraton Moana Surfrider-hotel. Later is die Royal Hawaiian bygevoeg (wat weens sy pienk fasade ook die Pink Palace genoem word), en Waikiki het daarna dekades lank 'n bestemming vir welgesteldes gebly. Waikiki se vermaaklikhede was beperk tot hula-dansopvoerings en seuns, wat op die strand hulle ukuleles gespeel het.

Die massatoerisme het tot die oprigting van talle wolkekrabbers met hotelle en woonstelle gelei, en Waikiki bied nou meer as 30 000 hotelbeddens (per nag) vir sowat twee miljoen besoekers per jaar aan. In 1988 is die gebied gedeeltelik herbou; die Kalakaua-laan is verbreed en palms is aangeplant om die buurt se voorkoms te verfraai.

Eksterne skakels[wysig]