Waleri Poljakof

in Wikipedia, die vrye ensiklopedie
Jump to navigation Jump to search
Valeri Poljakov

Waleri Poljakof (Russies: Валерий Владимирович Поляков, gebore Valeri Ivanovich Korshunov) is 'n voormalige Russiese ruimtevaarder. Poljakof hou die rekord vir die langste enkele ruimtevlug in menslike geskiedenis. Hy was vir meer as 14 maande (437 dae, 18 uur) aan boort van die Mir-ruimtestasie gewees.[1]

Poljakof is in 1972 as ruimtevaarder gekies. Hy onderneem sy eerste vlug in 1988 aan boort van die Sojoes TM-6. Hy het na 240 dae aan boord van die TM-7 na die aarde teruggekeer. Sy tweede vlug van 437 dae, die langste in die geskiedenis, het in 1994–1995 plaasgevind. Dié vlug is met 'n Sojoes TM-6 gelanseer en het met 'n TM-20 teruggekeer. Gekombineerd is dit die langste wat 'n persoon nog in die ruimte deurgebring het.[2]

Beknopte biografie[wysig | wysig bron]

Poljakof aan boort van die Mir-ruimtestasie in Februarie 1995, soos vanuit die Ruimtependeltuig Discovery afgeneem.

Waleri Poljakof is op 27 April 1942 as Valeri Ivanovitsj Korsjoenov gebore. Hy verander sy naam in 1957 na Valeri Vladimirovitsj Poljakov (sy stiefpa was Vladimir Poljakov). Hy behaal 'n diploma in 1959 waarna hy aan die I.M. Setsjenof Eerste Mediese Instituut in Moskou studeer. Hier behaal hy 'n doktorale graad waarna hy in ruimtekundige geneeskunde by die Instituut van Mediese en Biologiese Probleme van die ministerie van volksgesondheid (ook te Moskou) spesialiseer.

Hy is op 22 Maart 1972 uit Mediese Groep 3 as 'n ruimtevaarder gekies. Tydens sy loopbaan was hy die vlugdokter aan boord van die Sojoes TM-6, Sojoes TM-7, Sojoes TM-18, Sojoes TM-20 en ten slotte aan boord van die Mir-ruimtestasie. Aan boord van dieselfde Mir vestig hy die rekord vir die langste verblyf in die ruimte: 437 dae, 17 uur, 58 minute en 4 sekondes. Hy bly tot 1 Junie 1995 as 'n ruimtevaarder in diens.

Sy ruimtevlugte:

  • Sojoes TM-6 / Sojoes TM-7 – 28 Augustus 1988 tot 27 April 1989 – 240 dae, 22 uur, 34 minute
  • Sojoes TM-18 / Mir / Sojoes TM-20 – 8 Januarie 1994 tot 22 Maart 1995 – 437 dae, 17 uur, 58 minute

Poljakof is getroud en het een kind.

Verwysings[wysig | wysig bron]

  1. Schwirtz, Michael (30 Maart 2009). "Staying Put on Earth, Taking a Step to Mars". The New York Times. Besoek op 15 Mei 2010.
  2. "Valeri Vladimirovich Polyakov". New Mexico Museum of Space History. Besoek op 27 Januarie 2011.