Al Soefi

in Wikipedia, die vrye ensiklopedie
Abd Al-Rahman Al Soefi
Gebore 7 Desember 903
Oorlede 25 Mei 986 (op 82)
Nasionaliteit Iran
Vakgebied Sterrekunde, horologie
Bekend vir Andromeda-sterrestelsel, Magellaanse Wolke, Brocchi se Groep, asterisme

Abd Al-Rahman Al Soefi (* 7 Desember 903, † 25 Mei 986), wat ook bekend staan as Abd ar-Rahman as-Soefi of Abd al-Rahman Aboe al-Hoesain en in westerse bronne dikwels ook Azophi genoem word, was 'n Persiese sterrekundige aan die hof van die emir Adoed ad-Daula in Isfahan. Hy verwerf bekendheid deur sy bewerkings van Griekse sterrekundige vakliteratuur, veral Claudius Ptolemeus se "Groot Sterrekundige Stelsel", wat hy omtrent 800 onder die titel Almagest in Arabies vertaal is.

Sy navorsing in verband met die ligkrag van sterre het 'n aantal regstellings ten opsigte van Ptolemeus se lys van sterre moontlik gemaak. Hy lewer waardevolle bydraes tot die noukeurige berekening van die sonjaar se lengte en hou homself besig met die praktiese gebruik van die astrolabisme, 'n sterrekundige instrument in die vorm van 'n skyf met visierapparaat, wat reeds in Ptolemeus se tyd bekend was en die meganiese oplossing van sterrekundige en sterrekundig-geografiese vraagstukke moontlik gemaak het. Al Soefi is ook die eerste sterrekundige wat die samehang tussen die tradisionele Griekse en Arabiese name van sterre en sterrebeelde ondersoek.

In sy hoofwerk, die "Boek van die Sterre", verwys hy onder meer na die Groot Magellaanse Wolk en die Andromeda-sterrestelsel, waarby eersgenoemde eers eeue later weer deur die Portugese seevaarder Ferdinand Magellaan en laasgenoemde ná die uitvinding van die teleskoop in 1612 deur Simon Marius herontdek is.

'n Krater op die maan met 'n deursnee van 47 kilometer is na Al Soefi (Azophi) vernoem.