Denimbroek
vanuit Wikipedia, die vrye ensiklopedie.
'n Denimbroek of jeans (IFA: [dʒiːnz]) is 'n broek wat uit die katoenkepertekstiel denim vervaardig word. Denimbroeke is aanvanklik hoofsaaklik vir buite-arbeid ontwerp, maar het in die 1950's veral onder tieners gewild begin raak. Historiese klere-etikette wat denimbroeke vervaardig het, is bv. Levi's en Wrangler.
Denimbroeke is 'n baie gewilde vorm van informele drag regoor die wêreld. Die broeke kom in verskeie style en kleure, alhoewel die bloudenim (Engels: blue jeans) die algemeenste is.
