Encyclopædia Britannica

in Wikipedia, die vrye ensiklopedie
Spring na: navigasie, soek
'n Stel van die Encyclopædia Britannica

Die Encyclopædia Britannica (Latyn vir "Britse Ensiklopedie") is 'n algemene Engelstalige ensiklopedie gepubliseer deur Encyclopædia Britannica, Inc., 'n private maatskappy. Artikels is gemik op geletterde volwassenes, en word geskryf deur ongeveer 100 voltydse redakteurs en meer as 4 000 spesialisbydraers. Dit word beskou as die mees deskundig-onderlegde ensiklopedie.[1][2]

Die Britannica is die oudste Engelstalige ensiklopedie wat steeds in druk is.[3] Dit is vir die eerste keer gepubliseer tussen 1768 en 1771 in Edinburg, Skotland, en het toegeneem in gewildheid en omvang, sodat die derde uitgawe (1797) en aanhangsel daarvan (1801) twintig bande beslaan het.[4][5][6] Die opgang in aansien het bygedra tot die werwing van toonaangewende bydraers, en die 9de uitgawe (1875–1889) en die 11de uitgawe (1911) was 'n baken in terme van geleerdheid en letterkundige styl.[5] Beginnend by die 11de uitgawe, is die Britannica se artikels verkort en vereenvoudig ter wille van groter aanvaarding in die Noord-Amerikaanse mark.[5] In 1933, het die Britannica die eerste ensiklopedie geword om "deurlopende hersiening" te aanvaar, waarvolgens die ensiklopedie onverpoos herdruk word, en elke artikel geskeduleerd opdateer word.[6]

Die mees onlangse uitgawe, die 15de, beskik oor 'n unieke drieledige samestelling: 'n 12-bundel Micropædia met kort artikels (meestal minder as 750 woorde), 'n 17-bundel Macropædia met langer artikels (twee tot 310 bladsye) en 'n enkelband Propædia wat 'n rangordelike raamwerk van kennis verskaf. Die Micropædia is gemik op vinnige naslaan van feite en as 'n gids tot die Macropædia; lesers word aangeraai om die Propædia-raamwerk te raadpleeg om die onderwerp se konteks te verstaan en sodoende meer spesifieke artikels na te spoor.[7] Die grootte van die Britannica het vir 70 jaar min of meer konstant gebly, en bevat ongeveer 40 miljoen woorde en 'n halfmiljoen onderwerpe.[8] Alhoewel dit sedert 1901 in die Verenigde State gepubliseer word, het die Britannica Britse spelwyse behou.[1]

Die Britannica het moeite ondervind om winsgewend te bly.[3] Sekere artikels in vroeëre uitgawes is gekritiseer betreffende sorgvuldigheid, vooroordeel of ongekwalifiseerde bydraers.[5][9] Die akkuraatheid van dele van die 15de uitgawe is eweneens onder verdenking geplaas,[1][10] maar die bestuur van Britannica het teenargumente op die kritiek gelewer.[11]

Verwysings[wysig]

  1. 1,0 1,1 1,2 Kenneth Kister (1994). Kister's Best Encyclopedias: A Comparative Guide to General and Specialized Encyclopedias, 2de uitgawe, Phoenix, Arizona: Oryx Press. ISBN 0897747445. 
  2. Sader, Marian; Lewis, Amy (1995). Encyclopedias, Atlases, and Dictionaries. New Providence, New Jersey: R. R. Bowker (A Reed Reference Publishing Company). ISBN 0-8352-3669-2. 
  3. 3,0 3,1 "Encyclopedias and Dictionaries". Encyclopædia Britannica (15de uitgawe) 18. (2007). Encyclopædia Britannica, Inc.. 257–286. 
  4. Frank A. Kafker en Jeff Loveland, red., The Early Britannica: The Growth of an Outstanding Encyclopedia (Oxford: Voltaire Stigting, 2009).
  5. 5,0 5,1 5,2 5,3 Kogan, Herman (1958). The Great EB: The Story of the Encyclopædia Britannica. Chicago: The University of Chicago Press. Sjabloon:LCCN. 
  6. 6,0 6,1 "Encyclopædia". Encyclopædia Britannica (14de uitgawe). (1954).  Behalwe dat dit 'n uitstekende opsomming bied van die Britannica se geskiedenis en vroeë aanverwante produkte, beskryf hierdie artikel ook die lewenssiklus van 'n tipiese Britannica uitgawe. 'n Nuwe uitgawe begin tipies namate sterk verkope afplat wanneer die ensiklopedie verouderd raak. Wanneer werk aan 'n nuwe uitgawe aangepak word, droog verkope van die ou uitgawe op, presies wanneer fiskale behoefte die akuutste is: 'n nuwe redaksiespan moet saamgestel word, en artikels moet gedelegeer word. Elkan Harrison Powell het hierdie wisseling in inkomste uitgewys as 'n bedreiging vir enige ensiklopedie, en het die hoop uitgespreek dat deurlopende hersiening 'n oplossing kan wees.
  7. (2007) The New Encyclopædia Britannica, 15de uitgawe, Propædia, 5–8. 
  8. (2007) The New Encyclopædia Britannica, 15de uitgawe, Indeks aanhef. 
  9. George Lincoln Burr (1911). “The Encyclopædia Britannica: A Dictionary of Arts, Sciences, Literature and General Information”. American Historical Review 17 (1): 103–109. DOI:10.2307/1832843.
  10. Giles, Jim (15 Desember 2005). “Internet encyclopedias go head to head”. Nature 438 (7070): 900–901. DOI:10.1038/438900a. Besoek op 21 Oktober 2006.
  11. Fatally Flawed: Refuting the recent study on encyclopedic accuracy by the journal Nature”. (PDF) Encyclopædia Britannica, Inc: Maart 2006. URL besoek op 21 Oktober 2006.