Esprit Holdings
| Esprit Holdings Limited | |
  | |
| Tipe | Publieke maatskappy |
|---|---|
| Gestig | 1968 |
| Hoofkantoor | Pembroke, Bermuda-eilande |
| Sleutelpersone | Jose Manuel Martínez Gutiérrez (hoof uitvoerende beampte) |
| Gebied bedien | Wêreldwyd |
| Industrie | Kleinhandelbedryf |
| Produkte | Klerasie, bybehore, meubels |
| Inkomste |  HK$19,421 miljard (2015) |
| Bedryfsinkomste | HK$3,683 miljard (2015) |
| Werknemers | 9 179 (2015) |
| Webwerf | esprit.com |
Esprit Holdings is 'n internasionale mode-onderneming wat sy hoofkwartier in Pembroke op die Bermuda-eilande het, met twee operasionele hoofkwartiere in Ratingen, Duitsland (Europese hoofkwartier) en Kowloon, Hongkong (Asiatiese hoofkwartier). Die houermaatskappy se aandele word sedert 1993 op die Hongkongse aandelebeurs genoteer.[1]
Die onderneming het vanuit 'n beskeie begin tot een van die wêreld se vernaamste modewinkelkettings gegroei. In 1968 het die Amerikaanse stigters, Susie en Douglas Tompkins, begin om selfvervaardigde mode-klerasie vanuit hul Volkswagen-mikrobus te verkoop. Hiervoor het hulle vanuit hul woonplek in San Francisco deur die hele deelstaat Kalifornië gery. Drie jaar later het die egpaar sy eie onderneming, Esprit de Corp. gestig en nog in dieselfde jaar saam met Michael Ying, 'n voormalige voorsitter en aandeelhouer, 'n filiaal in Hongkong gevestig.
Tans bemark die onderneming sy produkte – naas mode-klerasie, -skoeisel en -bybehore ook huisartikels en meubels – onder die handelsmerke Esprit en edc in meer as veertig lande. Naas 890 modewinkels, wat deur die onderneming onder sy eie naam in Europa, Asië, Noord- en Suid-Amerika bedryf word, is Esprit-mode in meer as 7 800 ander winkels te koop, insluitende afdelingswinkels met Esprit-afdelings en konsessiesake, en Suid-Afrikaanse winkelsentrums en etiket-winkels, veral in Johannesburg en Kaapstad.[2]
Verwysings[wysig | wysig bron]
- ↑ "www.esprit.com: Investor relations – Stock information. Besoek op 17 April 2016". Geargiveer vanaf die oorspronklike op 18 Junie 2016. Besoek op 17 April 2016.
- ↑ "www.designer-clothes.co.za: Esprit in South Africa. Besoek op 17 April 2016". Geargiveer vanaf die oorspronklike op 30 Mei 2016. Besoek op 17 April 2016.