Giorgi Margwelasjwili

in Wikipedia, die vrye ensiklopedie
Giorgi Margwelasjwili
გიორგი მარგველაშვილი
Giorgi Margwelasjwili
Giorgi Margwelasjwili in 2014

President van Georgië
Ampstermyn
17 November 2013 – 16 Desember 2018
Eerste minister Bidzina Iwanisjwili
Irakli Garibasjwili
Giorgi Kwirikasjwili
Mamuka Bakhtadze
Voorafgegaan deur Micheil Saakasjwili
Opgevolg deur Salome Zurabisjwili

Minister van Onderwys en Wetenskap
Ampstermyn
25 Oktober 2012 – 18 Julie 2013
Eerste minister Bidzina Iwanisjwili
Voorafgegaan deur Chatia Dekanoidze
Opgevolg deur Tamar Sanikidze

Persoonlike besonderhede
Gebore 4 September 1969 (1969-09-04) (54 jaar oud)
Tbilisi, Georgiese Sosialistiese Sowjetrepubliek
(nou Georgië)
Politieke party Georgiese Droom
Eggenoot/-note Maka Chichua (sedert 2014)
Kind(ers) 3
Alma mater Staatsuniversiteit van Tbilisi
Sentrale Europese Universiteit
Georgiese Nasionale Wetenskapakademie
Handtekening

Giorgi Margwelasjwili (Georgies: გიორგი მარგველაშვილი; geb. 4 September 1969) is ’n Georgiese politikus wat vanaf 17 November 2013 tot 16 Desember 2018 as die land se president gedien het.

Hy het filosofie studeer en was twee keer rektor van die Georgiese Instituut van Openbare Betrekkinge. In Oktober 2012 het hy lid van die nuutgevormde kabinet van Bidzina Iwanisjwili geword as die minister van opvoeding en wetenskap. In Februarie 2013 is hy ook aangestel as eerste adjunk-premier. Margwelasjwili is in Mei 2013 deur die koalisie Georgiese Droom as presidentskandidaat aangewys en het in dieselfde jaar die Georgiese verkiesing met 62% van die stemme gewen. Hy is nie lid van enige politieke party nie.[1]

Opvoeding en akademiese loopbaan[wysig | wysig bron]

Giorgi Margwelasjwili is in Tbilisi gebore as die seun van Teimoeraz Margwelasjwili, ’n ingenieur, en Mzeana Gomelaoeri, ’n sielkundige.[2] Hy het in 1992 ’n graad in filosofie aan die Staatsuniversiteit van Tbilisi behaal. Hy het daarna in 1993–1994 aan die Sentraal-Europese Universiteit in Praag, Tsjeggië, en in 1993–1996 aan die Georgiese Akademie van Wetenskap studeer. In 1998 het hy ’n doktorsgraad in filosofie aan die Staatsuniversiteit van Tbilisi behaal.[3] Vroeg in die 1990's het hy as berggids by ’n reisagentskap gewerk en daarna by die Nasionale Demokratiese Instituut se kantoor in Tbilisi aangesluit.

Margwelasjwili was twee keer rektor van die Georgiese Instituut van Openbare Betrekkinge, van 2000 tot 2006 en van 2010 tot 2012. Tussen dié twee termyne was hy hoof van die instituut se navorsingsdepartement. Hy was in dié tyd ook gereeld ’n kommentator oor politieke en gemeenskapsake in Georgië.[3][4]

Politieke loopbaan[wysig | wysig bron]

Margwelasjwili het in 2012 ’n huishoudelike naam in Georgië geword[5] toe hy voor die verkiesing van November 2003 by die opposisieblok Boerdjanadze-demokrate aangesluit het. Hy was onder die eerste 10 kandidate van die blok.[6] Nadat bewerings van verkiesingsbedrog die Roosrewolusie tot gevolg gehad het, het die Boerdjanadze-demokrate met Micheil Saakasjwili se Verenigde Nasionale Beweging verenig en het Margwelasjwili die politieke toneel verlaat.[5]

In 2008 het hy lid geword van die raad van adviseurs van die vorige parlementêre voorsitter, Nino Boerdjanadze, se Stigting vir Demokrasie en Ontwikkeling.[7] Teen 2012 het hy Saakasjwili se regering gekritiseer. Hy het die Georgiese Droom-koalisie van Bidzina Iwanisjwili openlik gesteun, maar was nie regstreeks betrokke by die koalisie se verkiesingsveldtog nie.[1]

Minister[wysig | wysig bron]

Ná die oorwinning oor Saakasjwili se party in Oktober 2012 het Iwanisjwili die premier van Georgië geword en is Margwelasjwili, wat deur haar as "’n persoonlike vriend" en "’n intellektueel" beskryf is,[8] op 25 Oktober 2012 die minister van opvoeding en wetenskap geword.[4] In Februarie 2013 het Iwanisjwili hom as eerste premier aangestel.[8]

President[wysig | wysig bron]

Die inhuldiging van pres. Giorgi Margewlasjwili, 17 November 2013.

Op 11 Mei 2013 het die Georgiese Droom Margwelasjwili aangewys as sy presidentskandidaat vir die 2013-verkiesing. Iwanisjwili het gesê die besluit was eenparig.[9] Margwelasjwili en Iwanisjwili het albei bewerings verwerp dat hy ’n marionet in die hande van ’n ryk premier is.[10] Hoewel hy nie wetlik verplig was nie, het Margwelasjwili bedank om, soos hy dit gestel het, bewerings te voorkom van die misbruik van administratiewe bronne tydens die verkiesingsveldtog. Op 18 Julie 2013 is hy deur Tamar Sanikidze as minister opgevolg.[11]

Op 27 Oktober 2013 het Margwelasjwili die verkiesing met 62% van die stemme gewen.[12] Ná die verkiesing het hy gesê die verbetering van bande met Europa sal die land se prioriteit bly en die regering sal probeer om spanning tussen Georgië en Rusland te verminder.[13]

Met Margwelasjwili se inhuldiging op 17 November 2013 het ’n nuwe grondwet in werking getree wat die president se mag verminder en die premier se mag vergroot het.[14] Hy is op 16 Desember 2018 deur Salome Zurabisjwili opgevolg.

Verwysings[wysig | wysig bron]

  1. 1,0 1,1 Margvelashvili Named as GD's Presidential Candidate. Civil Georgia. 11 Mei 2013. URL besoek op 11 Mei 2013.
  2. Gelantia, Telara (15 Mei 2013). Financial declaration of "Georgian Dream" Presidential Candidate Geargiveer 3 November 2013 op Wayback Machine. PirWeli.
  3. 3,0 3,1 George Margvelashvili Geargiveer 5 Oktober 2013 op Wayback Machine. Government of Georgia. URL besoek op 30 Maart 2013.
  4. 4,0 4,1 Ivanishvili's Incoming Cabinet. Civil Georgia. 16 Oktober 2012. URL besoek op 30 Maart 2013.
  5. 5,0 5,1 Giorgi Margvelashvili. Civil Georgia. 15 Oktober 2013
  6. Burjanadze, Zhvania Offer Radical Changes. Civil Georgia. 22 Augustus 2003. URL besoek op 30 Maart 2013.
  7. Burjanadze Launches Foundation. Civil Georgia. 7 Julie 2008. URL besoek op 30 Maart 2013.
  8. 8,0 8,1 Education Minister to Become Deputy PM. Civil Georgia. 5 Februarie 2012. URL besoek op 30 Maart 2013
  9. Georgian PM names pro-Western ally presidential candidate Geargiveer 29 Oktober 2013 op Wayback Machine. Reuters. 11 Mei 2013.
  10. Metreveli, Irakli (25 October 2013). Georgia's presidential favourite a knitting academic. Agence France-Presse.
  11. New Education Minister Takes Office Geargiveer 29 Oktober 2013 op Wayback Machine. Civil Georgia. 18 Julie 2013.
  12. Georgia elections: Russia welcomes new president Giorgi Margvelashvili. The Daily Telegraph. 28 Oktober 2013.
  13. 'Europe is our choice' – Georgia's president-elect Margvelashvili Geargiveer 29 Junie 2018 op Wayback Machine. Euronews. 28 Oktober 2013.
  14. Margvelashvili Sworn-in as New President. Civil Georgia. 17 November 2013.

Eksterne skakels[wysig | wysig bron]