Hermafroditos

in Wikipedia, die vrye ensiklopedie
Spring na: navigasie, soek
Hermafroditos
Griekse god
Ermafrodito, affresco Romano di Ercolano (1–50 d.C., Museo Archeologico Nazionale di Napoli) - 02.jpg
Naam Hermafroditos
God van Biseksualiteit, verwyfdheid, seksualiteit en vrugbaarheid
Blyplek Berg Ida
Simbool Tirsos (’n soort staf), kantaros (drinkbeker)
Ouers Hermes en Afrodite
Broers en susters Eros, Pan, Priapos, Tyche, Deimos, Phobos
Romeinse eweknie Hermaphroditus

Hermafroditos (Grieks: Ἑρμαφρόδιτος) was in die Griekse mitologie die kind van Hermes en Afrodite. Hy was ’n mindere god van biseksualiteit en verwyfdheid. Volgens Ovidius was hy ’n besonder mooi seun wat in ’n tweeslagtige wese verander is nadat hy een geword het met die waternimf Salmacis. Sy naam is die basis vir die woord "hermafrodiet".

Simboliek[wysig]

Hermafroditos se naam is Hermaphroditus in die Romeinse mitologie, waar hy die seun van Venus en Mercurius is. Hy is al lank die simbool van biseksualiteit en verwyfdheid en is in Griekse en Romeinse kuns uitgebeeld as ’n vroulike figuur met manlike geslagsdele.[1].

Theophrastos se weergawe suggereer ook ’n verband tussen Hermafroditos en die instelling van die huwelik. Die verwysing na die vierde dag van die maand is betekenisvol: dit is die gelukkigste dag om op te trou. Sy verbintenis met die huwelik is blykbaar dat hy, as die draer van beide manlike en vroulike eienskappe, die eenwording van ’n man en vrou verteenwoordig. ’n Ander faktor is sy ouers se rol in die beskerming en seëning van bruide.[2]

Hermafroditos se naam is ’n samesmelting van dié van sy ouers, Hermes en Afrodite. Soms word hy Afroditos genoem. Al drie dié gode het ’n belangrike rol onder figure wat met erotiek en vrugbaarheid te doen het en het al drie duidelike seksuele ondertone. Die falliese god Priapos was in sekere mites ook die seun van Hermes, en die jong god van begeerte, Eros, was die seun van Hermes en Afrodite.

Mitologie[wysig]

Volgens Ovidius is Hermafroditus grootgemaak deur die Naiades in die grotte van Berg Ida[3], ’n heilige berg in Frigië (die huidige Turkye). Toe hy 15 jaar oud was, het hy verveeld geraak met sy omgewing en na ander stede gereis. In die woude naby Halicarnassos (die huidige Bodrum, Turkye) het hy die nimf Salmacis in haar waterpoel teengekom. Sy was vol begeerte vir die mooi jong seun en het hom probeer verlei, maar hy het geweier. Toe Hermafroditos dink sy is weg, het hy in die poel gaan bad. Salmacis het van agter ’n boom uitgespring en in die poel gespring. Sy het hom vasgedruk en teen sy sin gesoen, en terwyl hy hom probeer teensit het, het sy na die gode uitgeroep dat hulle nooit geskei word nie. Haar wens is toegestaan en hulle liggame het een geword, ’n wese "van albei geslagte" .[4] Hermafroditos het toe vir Hermes en Afrodite gevra dat dieselfde gebeur met enigiemand wat in dié poel bad. Sy wens is ook toegestaan.

Verwysings[wysig]

  1. Antonio Beccadelli (Eugene Michael O'Connor, tr., red.) Hermaphroditus: Introduction.
  2. Gods, goddesses, and mythology, Volume 1, deur C. Scott Littleton, Marshall Cavendish Corporation (2005) Google books
  3. Ovidius
  4. Ovidius

Eksterne skakels[wysig]

Commons-logo.svg
Wikimedia Commons het meer media verwant aan:
Hermafroditos (kategorie)


Crystal txt.png

Hierdie artikel is vertaal vanuit die Engelse Wikipedia