Howard Carter

in Wikipedia, die vrye ensiklopedie
Spring na: navigasie, soek
Howard Carter
’n Beeld van die betrokke persoonlikheid.
Howard Carter

Gebore 9 Mei 1874
Kensington, Londen, Engeland
Oorlede 2 Maart 1939 (64 jaar oud)
Kensington, Londen, Engeland
Nasionaliteit Brits
Beroep Argeoloog en egiptoloog
Bekend vir Ontdekking van farao Toetankamen se graf

Howard Carter (* 9 Mei 1874 in Kensington, Londen, Engeland; † 2 Maart 1939 in Kensington) was 'n Engelse argeoloog en egiptoloog wat bekendheid met die ontdekking van farao Toetankamen se graf (KV62) in die Egiptiese Vallei van Konings in Wes-Tebe verwerf het.

Op sewentienjarige ouderdom is Carter in 1891 deur 'n argeoloog aangestel om tydens uitgrawings in Beni Hassan sketse van argeologiese artefakte in Brits-besette Egipte te teken. Sy innovatiewe metodes van tekenwerk het aanklank gevind by argeoloë sodat Carter in die volgende jare by 'n aantal vindplekke werksaam was.

In 1907 is Carter deur die welvarende Britse adellike Lord Carnarvon, 'n geesdriftige amateur-egiptoloog, aangestel. Carnarvon het in 1914 'n lisensie verwerf om argeologiese opgrawings by KV62, die vermoede laaste rusplek van die jong farao Toetankamen in die Vallei van Konings, te doen. Carter het die opdrag gekry om die opgrawings te organiseer.

Maar eers jare later het 'n seun, wat as waterdraer aangestel is, op 'n steentrap afgekom. Die argeoloë-span het 'n verseëlde deur en 'n geheime kamer ontdek, en op 6 November 1922 het Carter en Lord Carnarvon die grafkamer vir die eerste keer betree. Die binnenste kamer met goudskatte en Toetankamen se sarkofaag is op 16 Februarie 1923 geopen.

Toetankamen se grafgifte was beskeie in vergelyking met dié van ander farao's, maar nogtans uniek omdat die grafkamer blykbaar nie deur grafrowers versteur is nie.