Joomla

in Wikipedia, die vrye ensiklopedie
Spring na: navigasie, soek
Joomla
Joomla-15-backend.png
Joomla 1.5

Ontwikkelaar Die Joomla Project Team
Mees onlangse weergawe 2.5.6/ 19 Junie 2012; 2 jaar gelede (2012-06-19)
Bedryfstelsel Kruisplatform
Lisensie GPL
Webblad www.joomla.com

Joomla is 'n vrye-, oopbron inhoudsbestuurstelsel vir die publikasie van inhoud op die wêreldwye web en intranette.

Die stelsel sluit verskeie kenmerke in soos die stoor van bladsye in 'n kasgeheue om werkverrigting te verbeter, RSS-voere, drukbare weergawes van bladsye, nuusflitse, webjoernale, meningspeilings, webwerf soektogte en aanpassings vir taalvoorkeure. Joomla word vrygestel onder die voorwaardes van die GPL en is 'n vertakking van die Mambo projek.

Die naam Joomla word amptelik geskryf met 'n uitroepteken daarna maar dit word meestal weggelaat.

Die sagteware is in die PHP programmeertaal geskryf en gebruik MySQL as databasis by verstek.

Geskiedenis[wysig]

Joomla het sy ontstaan te danke aan 'n vertakking van Mambo deur al sy kernontwikkelaars op 17 Augustus 2005. Op daardie tydstip was die Mambo naam 'n handelsmerk van Miro International Pty Ltd, wat 'n nie-winsgewende stigting gestig het met die gestelde doelwit om die projek te bevonds en te beskerm teen regsgedinge.[1] Die ontwikkelaarspan het beweer dat baie van die bepalings van die stigting se struktuur in stryd was met vorige ooreenkomste wat met die verkose Mambo stuurskomitee aangegaan is, dat daar geen raadpleging met sleutelrolspelers plaasgevind het nie en dat bepalings ingesluit is wat in stryd was met die kern waardes van oopbron sagteware.[2]

Die ontwikkelingspan het 'n webwerf geskep met die naam OpenSourceMatters om inligting aan gebruikers, ontwikkelaars, webontwerpers en die gemeenskap in die algemeen te verskaf. Die projek se spanleier Andrew Eddie (ook bekend as "MasterChief") het 'n opebrief aan die gemeenskap gerig[3] wat verskyn het op die kennisgewingsafdeling van die mamboserver.com openbare kennisgewingsafdeling.

'n Duisend mense het by die opensourcematters.org webwerf in die eerste dag aangesluit, en die meeste het hul steun vir die aksies van die ontwikkelingspan toegesê. Die webwerf het die slashdot-effek ontvang en nuus-artikels oor die gebeurtenis het op newsforge.com, eweek.com en ZDnet.com verskyn. Miro se hoof uitvoerende beampte Peter Lamont het in die openbare gereageer met 'n artikel genaamd "The Mambo Open Source Controversy - 20 Questions With Miro".[4]

Hierdie gebeurtenis het diepgaande gevoelens in die vrye sagteware gemeenskap aangeraak jeens wat "oopbron sagteware" beteken. Forums by baie ander oopbron projekte het ook aktiewe besprekings ten gunste en teen die beide partye se handelinge gehad.

In die twee weke na Eddie se aankondiging is spanne geherorganiseer en die gemeenskap het aangehou groei. Eben Moglen en die Software Freedom Law Center (SFLC) het die Joomla! kernspan in Augustus 2005 bygestaan soos blyk uit Moglen se webjoernaal inskrywing en verwante OSM aankondigings. Die SFLC ondersteun steeds die Joomla! projek met regshulp.[5]

Teen 1 September 2005 is die nuwe naam "Joomla" wat die Engelse spelling is vir die arabiese (en Urdu) woord, jumla, wat "almal saam" of "as 'n geheel" beteken. Op 18 Augustus 2005 het Andrew Eddie versoeke gerig vir gemeenskapsbetrokkenheid[6] vir insette oor name en aangedui dat die kernspan die finale besluit sou maak. Die naam wat die kerspan gekies het was nie in die lys van voorgestelde name nie en dit het gelei tot kwade gevoelens onder lede van die gemeenskap.

Op 7 September 2005 het die kernspan gevra vir voorstelle vir 'n kenteken[7] vanaf die gemeenskap en die gemeenskap uitgenooi om te stem oor die kenteken[8] en die nuwe kenteken is op 22 September 2005 aangekondig. Na die kies van die kenteken is 'n gids en handleiding vir die handelsmerk bekendgestel en is 'n stel kentekenhulpbronne gepubliseer vir gebruik deur die gemeenskap.[9]

Die eerste vrystelling van Joomla (Joomla 1.0.0) is op 16 September 2005 bekendgestel. Dit was basies 'n 'n vrystelling van Mambo in nuwe gewaad gekombineer met 'n paar foutregstellings en 'n paar sekuriteitsverbeteringe. Joomla weergawe 1.5 is op 22 Januarie 2008 vrygestel. Joomla het Packt Publishing se toekenning vir oopbron inhoudsbestuurstelsels verwerf in 2006[10] en in 2007.[11]

Kenmerke[wysig]

Die Joomla pakket bestaan uit vele onderdele, wat so modulêr moontlik gebou word om uitbreidings en intgerasies te vergemaklik. Daar bestaan vele uitbredingsprogramme wat Joomla se funksionaliteit kan uitbrei. Die Joomla Wikibot laat 'n skrywer van Joomla inhoud byvoorbeeld toe om wiki-etikette te gebruik in Joomla artikels wat outomaties dinamiese skakels na Wikipedia artikels skep. Daar is meer as 2 700 uitbreidings vir Joomla beskikbaar deur 'n uitbreidingsgids (die Extensions Directory), 'n werf wat deur OpenSourceMatters bestuur as 'n amptelike gids na Joomla uitbreidingsprogramme.[12]

Bo en behalwe bogenoemde uitbreidings, bestaan daar ook meer omvattende uitbreidingsprogramme wat as komponente bekendstaan. Hierdie komponente laat webmeesters toe om take te verrig soos om 'n gemeenskap te bou deur gebruikersfunksies uit te brei, 'n werf te rugsteun, inhoud te vertaal en URL'e te skep wat meer soekenjin vriendelik is.[13] Dan is daar ook uitbreidings genaamd modules beskikbaar wat sulke take verrig soos om kalenders te vertoon of die invoeg van pasgemaakte kode soos Google AdSense ens. moontlik maak.[14]

Daar is meer uitbreidings beskikbaar vir Joomla 1.0 as vir weergawe 1.5. Sommige van die ouer 1.0 uitbreidings kan gebruik word saam met die 1.5 weergawe as die versoenbaarheidsmodus ingestel word.

Joomla maak dit vir administrateurs moontlik om globale konfigurasie parameters te stel wat alle artikels beïnvloed. Elke blad sal dan aan hierdie verstellings by verstek voldoen, maar 'n blad kan indiwidueel verstel word. 'n Mens kan byvoorbeeld kies om 'n artikel se outeur te vertoon, te versteek of eenvoudig die globale verstelling gebruik wat die vertoon, aldan nie, van die outeur se naam by verstek bepaal.

Gemeenskap[wysig]

Joomla het amptelike en nie-amptelike gemeenskappe. Met ingang Februarie 2008 het die amptelike Joomla forum meer as 2 600 gesprekke en meer as 1,2 miljoen plasings van meer as 170 000 geregistreerde lede in 40 tale gehad.[15] Nie-amptelike werwe word in vele tale gepubliseer, dikwels met Joomla uitbreidings wat spesifiek van toepassing is tot daardie streek. Tweerigtingskrif steun vir Hebreeus en Arabiese tale kan byvoorbeeld op derde party gemeenskapsportale gevind word. Nie-amptelike webontwikkelaars kan ook uitbreidings en sjablone saamstel vir kommersiële verkoop en ook vryskut dienste aanbied. Sjablone word gewoonlik in ZIP-formaat versprei en kan deur die Joomla installeerprogram geïnstalleer word.

Verwysings en voetnotas[wysig]

  1. 2006-01-09, Mambo Foundation web site, Goals and objectives, http://www.mambo-foundation.org, nagegaan op 2007-03-14
  2. 2007-05-07, Joomla Forum Discussion by Development Team members and Community, http://forum.joomla.org/index.php/topic,73.0.html, 2007-05-07
  3. 2005-08-17, Andrew Eddie, Mambo Open Source Development Team - Letter to the community, http://www.opensourcematters.org/index.php?option=com_content&task=view&id=1&Itemid=1, OpenSourceMatters, nagegaan op 2007-03-14
  4. 2005-08-21, Ric Shreves, The Mambo Open Source Controversy - 20 Questions With Miro, oorspronklike url = http://ricshreves.net/content/view/116/47/, nagegaan op 2007-03-14, http://forum.joomla.org/index.php?topic=3037.msg23685, nagegaan op 2007-07-26
  5. http://www.joomla.org/content/view/40/41/
  6. http://forum.joomla.org/viewtopic.php?f=124&t=272
  7. http://forum.joomla.org/viewtopic.php?f=8&t=4205
  8. http://forum.joomla.org/viewtopic.php?f=8&t=5956
  9. http://www.joomla.org/content/view/259/70/
  10. 2006-11-14, 2006 Open Source Content Management System Award Winner Announced, Packt Publishing, http://www.packtpub.com/article/open-source-content-management-system-award-winner-announced, nagegaan op = 2007-03-08
  11. 2007-10-31, Joomla Wins Best PHP Open Source Content Management System, Packt Publishing, http://www.packtpub.com/article/joomla-wins-best-php-open-source-content-management-system, 2007-10-31
  12. Joomla Extensions Directory - FrontPage, http://extensions.joomla.org/index.php, nagegaan op 2007-10-13
  13. Joomla Extensions Directory - Content Management, 2007-07-28, http://extensions.joomla.org/component/option,com_mtree/task,listcats/cat_id,1766/Itemid,35/, nagegaan op 2007-07-28
  14. Joomla Extensions Directory - Content Management, 2007-07-28, http://extensions.joomla.org/component/option,com_mtree/task,listcats/cat_id,1766/Itemid,35/, 2007-07-28
  15. Joomla Community Forum, http://forum.joomla.org, 2008-02-18