Liesbeek (kiesafdeling)

Genl. Jan Smuts gesels met lede van sy kabinet, sen. A.M. Conroy, James Wellwood Mushet. LV vir Liesbeek van 1920 tot 1921, Jannie Hofmeyr en Frederick Sturrock, in 1946.

Liesbeek was 'n kiesafdeling in Kaapstad se suidelike voorstede van die heel eerste verkiesing van Suid-Afrika se Volksraad ná Uniewording in 1910 tot voor die verkiesing van 1929.

1910-1915

In die eerste verkiesing wen Basil Kellett Long, regsgeleerde en later redakteur van die Cape Times, van die Unionisteparty met 609 stemme bo E.P. Reilly, 'n onafhanklike kandidaat, en C.A. Lageson van die Regerende Party. Hy bedank op 9 Januarie 1914 as Volksraadslid en verhuis terug na Engeland. In die tussenverkiesing op 4 Maart 1914 wen Thomas Maginess die setel onbestrede vir die Arbeidersparty. Long was weer van 1938 tot 1943 Volksraadslid vir Kaapstad-Tuine. In die verkiesing van 1915 wen hy met 'n enkele stem meer as Beauclerk Upington, 'n onafhanklike. Die Nasionale Party se H.D. Stiglingh kom derde met 352 stemme, vergeleke met Maginess se 1 143 en Upington se 1 142. Maginess bly egter net tot 21 November 1915 Volksraadslid, maar dit is nie bekend hoe Upington daarin geslaag het om van 21 Desember 1915 wel Volksraadslid vir Liesbeek te word nie.

1920-1929

In 1920 wen die Unionisteparty weer in Liesbeek toe James Wellwood Mushet, latere minister in genl. Jan Smuts se kabinet, 52 stemme meer as die Arbeidersparty se Charles Pearce kry. Die Suid-Afrikaanse Party se C.A. Lagesen is slegs derde met 546 stemme. Mushet wen ook in 1924, nou as kandidaat van die S.A.P. nadat die Unioniste met die party saamgesmelt het, maar bly net aan tot Junie daardie jaar. In die tussenverkiesing op 8 September 1921 wen Pearce met 1 230 stemme meer as die S.A.P. se W. Laite. In die algemene verkiesing van 1924 behou Pearce die setel met 212 stemme meer as die S.A.P. se A.E.V. Fraser, maar voor die verkiesing van 1929 word Liesbeek afgeskaf en Pearce se loopbaan as LV kom so op 30 April 1929 tot 'n einde.

Sien ook

Bellville, Claremont, Constantia, De Kuilen, Durbanville, Groenpunt, Groote Schuur, Kaapse Vlakte, Kaapstad-Hawe, Kaapstad-Kasteel, Kaapstad-Sentraal, Kaapstad-Tuine, Maitland, Mowbray, Nuweland, Parow, Pinelands, Rondebosch, Seepunt, Simonstad, Soutrivier, Suid-Skiereiland, Tygervallei, Vasco, Woodstock, Wynberg

Bronne

• (en) Potgieter, D.J. (red.) 1972. Standard Encyclopaedia of Southern Africa. Cape Town: Nasionale Opvoedkundige Uitgewery (Nasou).
• (af) Schoeman, B.M. 1977. Parlementêre verkiesings in Suid-Afrika 1910-1976. Pretoria: Aktuele Publikasies.