Frederick Sturrock

Genl. Jan Smuts gesels met lede van kabinet, sen. A.M. Conroy, James Wellwood Mushet, Jannie Hofmeyr en Sturrock, in 1946.

Frederick Claud Sturrock (Newport, Skotland, 25 Mei 1882 - Kaapstad, 5 Augustus 1959) was 'n Suid-Afrikaanse sakeman en politikus.

Hy kry sy opleiding as ingenieur in Dundee, Skotland, kom in 1907 Suid-Afrika en vestig hom in Johannesburg waar hy 'n mynbou- en ingenieursaak vestig. In 1918 word hy gekies as voorsitter van die Johannesburgse Kamer van Koophandel. In 1924 dien hy in die Kommissie oor Onderwysadministrasie. Twee jaar later is hy weer voorsitter van die Johannesburgse Kamer van Koophandel en in 1929 word hy gekies as Volksraadslid vir Turffontein. In 1936 word hy as lid van die Verenigde Party aangestel as minister sonder portefeulje in genl. J.B.M. Hertzog se kabinet. Hy bedank egter in 1938 saam met Jannie Hofmeyr oor die beginsel van naturelleverteenwoordiging in die Senaat. Ná Hertzog in 1939 as eerste minister bedank oor die vraagstuk van deelname aan die Tweede Wêreldoorlog, word Sturrock minister van vervoer in genl. Jan Smuts se oorlogskabinet. Kort voor die 1948-verkiesing word hy minister van finansies. Hy bedank twee jaar later as Volksraadslid en sterf in 1959 in Kaapstad.

Bronne

• Albertyn, dr. C.F. (red.) 1962. Die Afrikaanse Kinderensiklopedie. Kaapstad, Bloemfontein, Johannesburg: Nasionale Boekhandel Bpk.