NG gemeente Johannesburg-Suid
Die NG gemeente Johannesburg-Suid was, soos die naam aandui, 'n gemeente van die Nederduitse Gereformeerde Kerk in die suidelike voorstede van Johannesburg.
Inhoud |
[wysig] Ontstaan
Die gemeente stig op 15 November 1950 af van die moedergemeente van die hele suidelike deel van Johannesburg, Turffontein, wat op sy beurt in 1906 van die gemeentes Jeppestown en Johannesburg-Oos afgestig het. Laasgenoemde twee is tweelingdogtergemeentes van die oorspronklike Johannesburgse moedergemeente, wat tegelykertyd op 8 Julie 1897 tot stand gekom het. By afstigting het Johannesburg-Suid bestaan uit die volgende stedelike gebiede: Booysens, Robertsham (waar die kerk gebou is), Crown Gardens en Mondeor, wat op 6 September 1961, dieselfde dag as Kroonrand[1], van Johannesburg-Suid afstig. In die buitestedelike gebiede binne die gemeentegrense het ook twee gemeentes afgestig: Danie Theron vir die kleinhoewes van Eikenhof in 1957 en die kleinhoewes in die omgewing van Walkerville in 1959 as NG gemeente Grasmere, waarvan die naam later verander is na Spioenkop en wat tans val binne die Sinode van Wes-Transvaal.
Die eerste leraar, prop. (later dr.) Johan Loedolff, is op op 17 Februarie 1951 in die gemeente bevestig. Hy verlaat die gemeente in 1954 om verder te studeer en word later dosent in sosiologie aan die Universiteit van Pretoria, waar hy oorspronklik in 1950 ook sy teologiese studies voltooi het.
[wysig] Tweede en laaste leraar
Loedolff se opvolger, ds. Johannes Lodewicus Coetzee, word in 1955 bevestig en dien die gemeente tot die samesmelting met Turffontein as NG gemeente Deo Gloria op 24 April 1994. Dit was enersyds vanweë die verhuising van groot getalle Afrikaanssprekendes uit sekere dele van Johannesburg se suidelike voorstede, maar andersyds omdat Turffontein se onderversekerde kerkgebou in 1992 afgebrand en die gemeente nie kon bekostig om dit te herbou nie en Johannesburg-Suid se leraar afgetree het[2]. Dié samesmelting het 'n einde gebring aan die 88-jarige bestaan van die oudste gemeente suid van die middestad, van wie al die gemeentes in die suide dogters of kleindogters is of was.
Die gemeente het in 1994 (die laaste inskrywing in 'n NG Kerk-jaarboek) 62 dooplidmate en 252 belydende lidmate gehad en Turffontein 90 dooplidmate en 346 belydende lidmate.
Johannesburg-Suid se gebouekompleks op die hoek van Alamein- en Fancestraat in Robertsham is die tuiste van die saamgestelde gemeente, wat in 2010 net 58 dooplimate en 367 belydende lidmate oorgehad het en waarvan ds. A.D.P. de Villiers sedert 1999 die leraar was.
[wysig] Ligging
Die kerkgebou is geleë in Alameinweg in Robertsham.[3]
[wysig] Twee leraars
- Johan Frederick Loedolff, 1951 - 1954
- Johannes Lodewicus Coetzee, 1955 - 24 April 1994 (sy eerste en enigste gemeente en die gemeente se tweede en laaste leraar in sy 44-jarige bestaan)
[wysig] Verwysings
- ^ Kroonrand op Facebook
- ^ Beeld
- ^ Alameinweg, Robertsham, Google Maps
