Netwerk (Namibië)

Netwerk se logo.

Netwerk is 'n onafhanklike, nie-politiese, vrywillige, Christelike Afrikaner organisasie in Namibië, gerig op die bevordering van die belange van Afrikaners in Namibië om sodoende die land en die breë gemeenskap te dien, sonder om ander groepe se belange te benadeel. Voorts streef die organisasie om die ontwikkeling van Afrikaners tot uitnemendheid op elke terrein van die samelewing te bevorder en die bemagtiging van Afrikaners om hulle welvaart te help verbeter, ten einde ander gemeenskappe te bemagtig.

Geskiedenis

Weens kommer oor die bewaring van die Afrikanerkultuur en ekonomiese tradisies sowel as die uitbou daarvan in Namibië het ʼn paar individue die organisasie Netwerk in 2006 gestig om Afrikanerbelange te bevorder.

Netwerk het uitgereik na die enkele oorblywende Afrikanerorganisasies en begin om die werksaamhede te koördineer. Voorts het Netwerk Afrikaner eiendomme en finansiële bates in Namibië gekonsolideer in samewerking met die Selfhelp Trust, sodat die bates meer gekonsolideerd aangewend kan word vir die bevordering van die Afrikanerkultuur in Namibië.

Die Selfhelp Trust het in die middestad van Windhoek ’n bymekaarkomplek vir Afrikaners opgerig en dit "Ons Erfdeel" genoem. Op die terrein is die Bittereinder-monument, een van die min Afrikaner-monumente in Namibië. Ons Erfdeel huisves vandag ’n Afrikaner argief, biblioteek en is ’n bymekaarkomplek vir Afrikaanse taal- en kultuurorganisasies.

Doelstelling van Netwerk

• Bevordering van die belange van Afrikaners om daardeur die land en die breë gemeenskap te dien, sonder die benadeling van die ander se belange;
• Bydrae tot die ontwikkeling van Afrikaners tot uitnemendheid op elke terrein van die samelewing; en
• Bemagtiging van Afrikaners om hulle welvaart te help verbeter, ten einde ander gemeenskappe te bemagtig.

Aksies

Netwerk poog om netwerke in die breë gemeenskap uit te brei, deur om Afrikaanse besighede aan mekaar voor te stel en te laat netwerk met die doel om verdere onderlinge besigheidsverhoudings te versterk. Aktuele sprekers word ook genooi om waarde toevoeg tot besighede en individue. Netwerk bevorder ook kontak en interaksie met ‘n veelheid van Namibiese en Suid-Afrikaanse Afrikaanse belangegroepe.

Op 18 April 2024 het Netwerk Namibië as 'n amptelike Beyweraar vir die Afrikaanse Wikipedia aangesluit.

Bronne

• https://www.linkedin.com/in/netwerk-namibi%C3%AB-40165b18a/?originalSubdomain=na
• Die Republikein
• Netwerk Prospektus, Januarie 2023.