Sean Connery

in Wikipedia, die vrye ensiklopedie
Spring na: navigasie, soek
Sean Connery
'n Beeld van die betrokke persoonlikheid.
Geboorte 25 Augustus 1930
Edinburg, Skotland
Nasionaliteit Brits
Beroep(e) Akteur
Internet-rolprentdatabasis-profiel

Sir Thomas Sean Connery (* 25 Augustus 1930 in Edinburg, Skotland) is 'n Britse akteur en vervaardiger.

Connery is veral bekend vir sy vertolking van die geheime Britse agent James Bond - in hierdie rol het hy tussen 1962 en 1983 in altesaam sewe rolprente op die silwerdoek verskyn. Gedurende sy loopbaan het hy ook in 'n reeks ander suksesvolle rolprente soos Marnie, The League of Extraordinary Gentlemen, Indiana Jones and the Last Crusade, The Hunt for Red October, Highlander, Murder on the Orient Express, Dragonheart en The Rock verskyn.

Sy werk as akteur is met 'n aantal toekennings bekroon, waaronder een Academy Award (Oscar), twee BAFTA Awards en drie Golden Globes. In Julie 2000 is hy tot ridder geadel. Connery het in 2005 aangekondig dat hy uit die rolprentbedryf sou aftree.

Biografie[wysig]

Sean Connery is op 25 Augustus 1930 in die Skotse hoofstad Edinburg gebore.

Hy het gedurende die Groot Depressie grootgeword, en sy gesin het in 'n moeilike finansiële situasie verkeer. Sy vader het as vragwabestuurder en sy moeder as huishoudster gewerk. Connery het die skool reeds op die ouderdom van vyftien verlaat om sy gesin finansieel te ondersteun. Op die leeftyd van sestien het hy by die Britse Vloot aangesluit.

Ná sy militêre loopbaan het hy aanvanklik geleentheidswerk verrig en in sy vryetyd sport beoefen. Dit was juis sy fisieke konstitusie wat hom 'n ekstra inkomste as model by die Edinburgse Kunsskool besorg en uiteindelik 'n modelloopbaan laat begin het. In 1953 het hy by die Mr. Universe-modelwedstyd 'n derde plek in die kategorie van mans met 'n liggaamsgrootte van meer as 1,80 meter behaal.

Vanaf 1953 het Connery ook sy akteursloopbaan met rolle in 'n aantal toneelstukke begin. Drie jaar later het hy sy eerste filmrol vertolk. Ondanks die feit dat hy nooit 'n opleiding as akteur gevolg het nie, is Connery bdeur die rolprentvervardigers Harry Saltzman en Albert R. Broccoli vir die rol van die geheime agent James Bond gekies. Met die Bond-riller Dr. No, waarin Connery saam met Ursula Andress die hoofrol gespeel het, het sy internasionale deurbraak as akteur gekom. Reeds in die volgende jaar het hy in sy tweede Bond-Riller From Russia With Love opgetree.

Uiteindelik sou Connery die rol van James Bond sewe keer vertolk. Een van sy suksesvolste rolprente in hierdie reeks was Goldfinger (1964) met die Duitse akteur Gert Fröbe in die titelrol. In 1962 het Connery met die Australiese aktrise Diane Cilento getrou. Die huwelik sou elf jaar duur, sy seun Jason Connery is in 1963 gebore.

Danksy die regisseur Alfred Hitchcock het Connery in 1964 met die rolprent Marnie die geleentheid gekry om sy talent as akteur ook buite die Bond-reeks te bewys. In 1975 het Connery met sy tweede vrou, die skilderes Micheline Roquebrune, getrou. Hierdie huwelik sou kinderloos bly. In die volgende jare sou Connery 'n repertoire van suksesvolle karakterrolle opbou.

So het hy in 1977 'n rol in die oorlogsdrama A Bridge Too Far vertolk. In 1984 het hy in die nie-amptelike Bond-riller Never Say Never Again met Klaus Maria Brandauer en Kim Basinger nog eens as geheime agent 007 opgetree.

Dit was veral Connery se talent om in uiteenlopende rolle en genres uit te blink wat van hom 'n uiters gewilde akteur by rolprentvervaardigers gemaak het. So het hy in 1986 as monnik William of Baskerville saam met Christian Slater in die historiese drama The Name of the Rose opgetree. Sy newerol in The Untouchables (1987) is met twee toekennings, die Golden Globe en die Academy Award (Oscar), bekroon.

Sy geboortestad Edinburg het hom in 1991 met die toekenning Freedom of the City of Edinburgh vereer. Ander toekennings sluit sy lidmaatskap in die Franse Légion d'Honneur (Erelegioen) en die Cecil B. DeMille Award in. Die grootste waardering teenoor sy werk as akteur is egter deur koningin Elizabeth II betuig wat hom in 2000 tot ridder geslaan het.

Op politieke gebied het Connery hom vir die onafhanklikwording van Skotland beywer. Met sy stigting Scottish International Educational Trust bevorder Connery die loopbaan van jong talente.

Ná sy aftrede in 2005 is Connery met die Europese Filmprys (2005) en die AFI Life Achievement Award bekroon.

Eksterne skakels[wysig]

Commons-logo.svg
Wikimedia Commons het meer media verwant aan:
Sean Connery (kategorie)