Sterrestad

Sterrestad (Russies: Звёздный городок; Sterrestadjie) is 'n kunsmatige stad in Rusland, noordoos van Moskou, waar ruimtevaarders in die Joeri Gagarin-ruimtevaartopleidingsentrum (GCTC) deur middel van realistiese simulasies van byvoorbeeld nul-swaartekrag praktiese opleiding vir hulle ruimtesendings kry.

Met die planne van die Sowjetunie om mense die ruimte in te stuur, ontstaan die behoefte aan 'n opleidingsentrum vir toekomstige ruimtevaarders in 1960. Sterrestad is gestig as woonplek vir ruimtevaarders en hulle gesinne en vir werknemers wat die opleidingsgeriewe in stand hou en hulle families. Die gesinne van ruimtevaarders bly in Sterrestad selfs al het die ruimtevaarder intussen afgetree of verongeluk. In die Sowjettyd was Sterrestad 'n uiters geheime lugmagbasis, wat op geen enkele kaart aangedui is nie.

Sterrestad het tans alle nodige geriewe, onder meer 'n eie poskantoor, 'n winkel vir daaglikse boodskappe en 'n museum wat aan ruimtevaart gewy is. In die museum is onder meer die diplomas van Joeri Gagarin en verskillende toekennings wat hy ontvang het, te sien.

Standbeeld vir Joeri Gagarin in Sterrestad.

'n Ruimtevaarder by die ingang van die museum in Sterrestad.