Vlugsout

'n Boksie vlugsout.

Vlugsout is ‘n middel wat gebruik word om mense wat flou geword het weer by te bring en die bewussyn aan te wakker.

Die aktiewe bestanddeel van vlugsout is ammoniumkarbonaat. Gewoonlik kom dit voor as wit kristalle. Vir die gerief van en om die reuk meer aanvaarbaar te maak word dit gewoonlik as ‘n vloeistof geparfumeer met laventel- of bloekomolie bemark.

Vlugsout is ‘n snel vervlietende sout wat ammoniumgas vrystel. Dit het ‘n skerp prikkelende geur wat die slymvliese van die mond, neus en longe irriteer. Daardeur stimuleer dit die spiere wat die asemhaling beheer. Daarom gebruik atlete vlugsout as ‘n stimulant om hul prestasie te verhoog. Boksers wat uitgeslaan word, gebruik dit om vinnig hul bewussyn te herwin. Die gebruik van hierdie gas in groot hoeveelhede oor ‘n lang tydperk kan vir die mens egter gevaarlik wees.

Vroeër dae het vlugsout ook bekendgestaan onder die name hertshoring (hartshorn) en sal volatile. Die woord vlugsout is dus ‘n direkte vertaling uit Latyn: sal is sout en volatile is vlugtig.