Walter Ulbricht
Walter Ulbricht (* 30 Junie 1893 in Leipzig, † 1 Augustus 1973 naby Berlyn) was 'n Duitse kommunistiese politikus.
Ulbricht het 'n beroepsopleiding as timmerman ontvang en in 1912 by die Sosiaal-Demokratiese Party van Duitsland (SPD) aangesluit. Ses jaar later het hy 'n lid van die ver-linkse Spartakusbund geword en in 1919 by die Kommunistiese Party van Duitsland (KPD) aangesluit. Sedert 1927 was hy 'n lid van die Sentrale Komitee en vanaf 1929 van die Politburo van die KPD.
Ná die Nasionaal-Sosialistiese magsoorname het hy tussen 1933 en 1935 as balling in Praag, Brussel en Parys gebly en later na die Sowjetunie gevlug waar hy die Nasionale Komitee Freies Deutschland georganiseer het. Ná die einde van die Tweede Wêreldoorlog het Ulbricht in 1945 na Duitsland teruggekeer om 'n leidende rol by die stigting van die Sosialistiese Eenheidsparty van Duitsland (SED) te speel. Danksy die steun, wat hy uit Moskou ontvang het, het hy vinnig dié party se leidende politikus geword. Sedert 1950 het hy die amp van Sekretaris-Generaal en vanaf 1953 dié van Eerste Sekretaris van die Sentrale Komitee van die SED beklee. Daarnaas het hy reeds sedert 1949 as vise-premier van die Duitse Demokratiese Republiek (DDR) gedien.
Vanaf 1960 het Ulbricht as Voorsitter van die Staatsraad ook formeel die amp van staatshoof van die DDR beklee. Sy teenstand teen Moskou se ontspanningsbeleid onder Bresjnef was een van die hoofredes vir sy ontmagting in 1971 toe hy deur Erich Honecker opgevolg is. Ulbricht het nogtans tot en met sy afsterwe in 1973 steeds as ere-voorsitter van die SED ('n amp wat eers vir hom geskep is) en as Voorsitter van die Staatsraad gefungeer.
Ulbricht se naam word verbind met die Stalinistiese beleid in Oos-Duitsland in die vroeë 1950's, die nasionalisering van nywerhede en die kollektivering van die landbousektor, die bou van die Berlynse Muur in 1961, maar ook met 'n kulturele liberalisering in die 1960's en pogings om nouer ekonomiese bande met Wes-Duitsland aan te knoop.
[wysig] Eksterne skakels
Media
