Zygmunt Krasiński

in Wikipedia, die vrye ensiklopedie
Spring na: navigasie, soek
Zygmunt Krasiński
’n Beeld van die betrokke persoonlikheid.
Krasiński, portret uit die 1850's

Geboortenaam Napoleon Stanisław Adam Ludwig Zygmunt Krasiński
Gebore 19 Februarie 1812
Parys, Frankryk
Oorlede 23 Februarie 1859 (op 47)
Parys, Frankryk
Nasionaliteit Vlag van Pole Pole
Ouers Wincenty Krasiński
Maria Urszula Radziwiłł
Beroep digter
Huweliksmaat Eliza Branicka (1843-1876)
Kind(ers) Władysław Krasiński
Zygmunt Jerzy Krasinski
Maria Beatrix Krasińska
Eliza Krasinska

Graaf Napoleon Stanisław Adam Ludwig Zygmunt Krasiński [ˈzɨɡmunt kraˈɕiɲskʲi], * 19 Februarie 1812 in Parys, Frankryk; † 23 Februarie 1859 in Parys), was 'n Poolse adellike en digter na wie saam met Adam Mickiewicz en Juliusz Słowacki as "Nasionale Barde" verwys word. Hierdie drietal Romantiese digters het tydens die periode van vreemde oorheersing beduidende invloed op die nasionale bewussyn van die Poolse volk uitgeoefen.

Lewe en werk[wysig]

Krasiński was die seun van graaf Wincenty Krasiński, 'n generaal van Napoleon Bonaparte en lid van die adellike Krasiński-familie. Hy het regswetenskappe aan die universiteite van Warskou en Genève gestudeer. In die laasgenoemde stad het hy kennis gemaak met Adam Mickiewicz.

In sosio-politieke opsig was Krasiński konserwatiewer as die ander twee digters en het baie van sy werke anoniem gepubliseer. Hy het veral bekendheid verwerf met sy filosofies-messianistiese gedagtes. Sy drama Nie-boska Komedia ("Die On-Goddelike Komedie") uit die jaar 1835 behandel die tragedie van 'n ou-wêreldse adelsklas wat deur 'n nuwe, kommunistiese en demokratiese maatskaplike orde tot val gebring word. Dit is 'n digterlike profesie van klassestryd en Rusland se Oktober-rewolusie. 'n Ander drama, Irydion (1836), tematiseer die vryheidsstryd van 'n onderdrukte nasie teen sy oorheerser binne die konteks van Christelike etiek.

Krasiński se werke is sterk deur 19de eeuse gruwelromans, die Angel-Saksiese Gothic novels, en Dante Alighieri beïnvloed. Uit sy bekendste werke blyk dat die digter veral in die uiterstes van die menslike bestaan belang gestel het - soos byvoorbeeld haat, wanhoop of eensaamheid. Sy Agaj-Han (1834), wat in Pole by die bekendste 19de eeuse werke gereken word, is 'n verhalende roman wat op historiese gebeurtenisse baseer, maar verskil nogtans duidelik van tradisionele historiese romans soos dié van Walter Scott wat by Poolse lesers gewild geraak het. Dit is eerder 'n grieselike verhaal van dood, broedermoord en tragiese noodlot en kontrasteer sterk met sy latere werk Psalmy Przyszłości ("Psalms van die toekoms") waarin Christelike waardes soos liefde en liefdadigheid sentraal staan.

Krasiński het op 26 Julie 1843 met die Poolse gravin Eliza Branicka (1820-1876) getrou.

Eksterne skakels[wysig]


Flag of Poland Die Drie Barde
Adam Mickiewicz.jpg Juliusz Słowacki 1.PNG Zygmunt Krasiński by Walkiewicz.PNG
Mickiewicz Słowacki Krasiński