A Retrieved Reformation
 | Hierdie artikel is 'n weesbladsy. Dit is nie geskakel of in ander bladsye ingesluit nie. Help Wikipedia deur na moontlike teks te soek en 'n skakel hierheen te plaas. |
A Retrieved Reformation
| |
|---|---|
| Skrywer | O. Henry |
| Land |  Verenigde State |
| Taal | Engels |
| Genre | Kortverhaal |
| Uitgewer | |
| Uitgegee | 1903 |
| Medium | Boek |
A Retrieved Reformation ("'n teruggewonne reformasie") is 'n kortverhaal deur die Amerikaanse skrywer O. Henry wat in April 1903 in The Cosmopolitan Magazine verskyn het. Dit beskryf die gebeure wat tot die reformasie van'n ex-gevangene gelei het. In 1910 het dramaturg Paul Armstrong die storie in 'n hoogs suksesvolle Broadway-teaterstuk onder die titel Alias Jimmy Valentine verwerk. Die stuk het 155 optredes by Wallack's Theatre in New York gehad, en die toneelstuk is daarna driekeer verfilm: in 1915 onder regie van Maurice Tourneur met die hoofrol deur Robert Warwick vertolk, in 1920 onder regie van Edmund Mortimer met Bert Lytell, en in 1928 onder regie van Jack Conway met William Haines, die eerste Metro-Goldwyn-Mayer klankfilm met dialoog. Die gewildheid van die verhaal as 'n rolprent het grootliks tot die skrywer se bekendheid bygedra, alhoewel sy naam nie in die Engelse, Franse en Spaanse weergawes genoem is nie. Die karakter van Jimmy Valentine is op werklike gebeure gebaseer, maar is nogtans vergelykbaar met die vernaamste voorval in hoofstuk 17 van Victor Hugo se Les Misérables.[1]
Die storie is ook in 'n radio-vervolgverhaal aangepas, Alias Jimmy Valentine, wat tussen 1938 en 1939 uitgesaai is.[2]
Verhaal[wysig | wysig bron]
Kasbreker Jimmy Valentine word na minder as tien maande van 'n vier jaar vonnis vrygelaat, as gevolg van sy kriminele kontakte. Hy keer na sy ou woonstel terug, pak sy gereedskap, en trek uit. In die volgende weke vind 'n aantal inbrake plaas waar kontant buitgemaak word, en Ben Price, die speurder wat Valentine die laaste keer gevang het, word ingeroep om die nuwe gevalle te ondersoek. Hy besef dat die inbrake Jimmy se modus operandi dra.
Valentine duik later in Elmore, Arkansas, op. Hy gaan na die dorp se bank met die opsig om dit uit te kyk in voorbereiding op 'n inbraak. Terwyl hy na die hotel stap, vang hy die oog van die bankier se pragtige dogter, Annabel Adams. Hy raak op die daad op haar verlief en besluit om sy kriminele loopbaan te beëindig. Hy trek in die dorp in, en neem die identiteit van Ralph D. Spencer, 'n skoenmaker, aan, omdat hy in die tronk skoenmaakarbeid geleer het.
Teen die einde van die jaar het Jimmy se sosiale en besigheidsaansien gestyg en hy is verloof aan Annabel. Twee weke voor die troue skryf hy 'n brief aan 'n vriend, waarin hy die vriend vra om sy inbraak-gereedskap by hom te kry, omdat Valentine dit nie meer nodig het nie.
Teen hierdie tyd het Price hom egter opgespoor en duik by die bank op terwyl Jimmy en Annabel se familie daar is. Jimmy dra die sak met sy gereedskap terwyl Annabel se pa vir hulle die bank se nuwe brandkluis wys. Annabel se niggies is gefassineer daardeur, en terwyl hulle speel, sluit die een niggie per ongeluk die ander binne die brandkluis toe, sonder dat die tydslot opgewen is, of enige kombinasie gestel is. Almal is paniekbevange en Annabel pleit dat Jimmy iets moet doen. Jimmy, met die wete dat dit sy ware identiteit sal openbaar, gebruik sy gereedskap om die deur oop te maak en red die kind. Sonder dat Valentine dit besef, het Price die hele voorval gesien.
Valentine stap by die bank uit en hy sien Price by die deur staan. Hy gee homself aan Price oor, maar tot sy verbasing, gee Price geen teken dat hy hom herken nie, en loop weg.
Verwysings[wysig | wysig bron]
Eksterne skakels[wysig | wysig bron]
- "A Retrieved Reformation" op die Internet Argief (geskandeer boeke)
- "A Retrieved Reformation" op Wikisource
- Vrye audioboek by Librivox